為了實現媽媽遺願，我成為了女兒國唐僧: K523

我：「的確唔收，我無記錯嘅話剩係收VISA，master同銀聯，唔係妳用我都唔知有AE呢樣嘢，雖然諗返起又真係見過個logo。」
V：「唔緊要，我重有呢張，唔使留低洗碗。」
Q：「嘩…嘩嘩！雙黑卡呀，交叉仔你重唔除褲？」
我：「右女神妳講真㗎？其實…我有少少怕醜…」
Q：「梗係真啦，大小姐叫到連我都要除褲啦，咁你服侍佢下面，我服侍佢上面啦。」
我：「妳肯定…要讓佢下半身畀我咁大方？」
Q：「唔係我讓畀你呀，係大小姐話要臨幸你我點敢爭喎？」我有個疑問，係爭我下面定佢下面…
V：「夠喇！你兩個都蝦我嘅！」佢面紅晒勁可愛。
Q：「唔玩住，找埋條數先，嗱，扣埋晒啲K Dollar呢度啱啱好㗎喇，條友食咁鬼多。」佢攞咗張啡牛出嚟。
V：「其實…無所謂㗎喎，會唔會攪到你平時捱餓…」




Q：「唔會啦，我有好好生活，如果真係食唔起嘅話到時我會迫妳陪我去食M記。」
V：「嗯，我會唔會攪到妳要賣身畀佢㗎？我會心痛…」
Q：「唔會啦，唔係我肯唔肯賣嘅問題，係呢條友都買唔起，佢咁鬼窮…」
我：「雖然係事實，但可唔可以顧及一下我嘅感受…」
V：「咁如果佢賣身畀我先，然後咪有錢買妳囉，最後妳就有錢埋單。」
Q：「係喎！點解我諗唔到呢條絕世好橋嘅，重可以創造經濟添，我哋呢個內循環可以增加香港GDP！」
V：「Yeah！咁我哋下次再食貴啲，一於上去Rosewood鋸扒啦！啦啦啦…」
Q：「大小姐，係咪我唔賣身妳就真係唔安樂？」
V：「哎吔，妳做乜同我計喎，妳賣身畀我咪得囉，我等緊妳除褲㗎，下次我要再同妳一齊沖涼。」
Q：「可以…但妳係咁非禮我…會阻住我沖涼。」




V：「邊有喎！我明明就幫妳捽到對波反光咁乾淨！」
Q：「係妳落得太多番梘，攪到我沖極都重有泡。」
V：「妳唔准同我計呀！成世都唔准…」又攬埋一嚿。
行多幾步我哋就返到停車場上車，兩個女仔手拖手上返後座，有時心諗日日咁玩法其實都幾攰。管家又車返我哋返屋企然後先送幽蘭返去，兩個女仔再依依不捨咁再見…大佬！十二個鐘後妳哋又有得見喇，救命！
返到屋企，QQ就除咗條手繩出嚟冥想，我就換衫準備落返去開工，其實我都好難理解到QQ嘅感受。
我：「佢使錢真係唔使諗咁，話送畀妳就送畀妳。」
Q：「係，我以前都差唔多㗎咋，我真係無得同佢計。」
我：「由得佢啦，反正佢咁惜妳，妳又對佢咁好。」