為了實現媽媽遺願，我成為了女兒國唐僧: K511

我：「咁做開少爺，如果真係俾人趕走，第二日就投降返屋企啦。」
管：「哦，咁佢精呀，佢叫老爺分三千八百萬畀佢，等佢自生自滅，互不拖欠，你話係咪激死人。」
我：「欸…但點解會係三千八百萬嘅？好意頭啲？」
管：「因為…嗰個年代六合彩頭奬最高派彩金額就係三千八百萬。」原來有奇女必有奇父，證明中頭奬打跛腳唔使做係所有人嘅心願嚟，睇嚟幽蘭喺機場匿埋唔上飛機只係小兒科。
我：「原來以前有啲咁嘅嘢，我都未聽過。」
管：「你哋呢代唔知係正常，因為出世前已經取消咗呢個限制，當年我以帶佢出去鍛鍊身體做藉口，偷偷地帶佢去打波，玩war game，玩水佢先開心返啲，重要我呢個讀書唔叻嘅人陪佢一齊溫書，每次有啲嘢我完全唔識嘅話就會笑鬼我，重要好開心…」
我：「咁點解佢會唔明自己個女㗎…」
管：「唔同嘅，男仔同女仔唔可以一概而論，我都無可能偷偷帶大小姐出去玩啦，係Queenie先可以令佢…」
呢個時候兩位公主終於出返嚟，本來幽蘭重係一副奸笑樣，但一見到管家喺度就變返正經。
V：「管家，你咁快上咗嚟嗱？」




管：「嗯，我要送妳返屋企吖嘛。」
聽到管家咁講佢又即時扁嘴，其實佢今朝返學校一齊開會到而家已經玩咗好耐，明明屋企高床軟枕珍饈百味都唔想返去，就知佢到底有幾想逃離呢個家；又可能如QQ所講，無嘢爽得過自由自在，包括喺我面前飛釘露底…
不過現實就係管家要帶我哋去錶位上車打道回府，點知去到架車嗰陣幽蘭講咗句驚為天人嘅嘢，我同QQ都嚇親。
V：「管家，我今晚可唔可以唔返屋企食飯呀？」
管：「嗯，大小姐今晚做乜唔想返屋企食飯呀？」
V：「重使問嘅，咁就梗係因為我想陪朋友啦！」
管：「關於呢樣嘢，我就控制唔到妳嘅，但你爹地就落機㗎喇喎，如果佢發現妳唔喺屋企嘅話實會問妳。」
V：「做乜喎，佢係咪連喺個天空上面都要管住我去邊呀…咁佢係咪落咗機之後即刻返嚟陪我食飯吖？」
管：「應該就唔得嘞，佢八點落機返到嚟都九點幾，而且飛機上面有晚餐供應，但你唔好唔記得佢搭first係有上網服務，一陣佢可以隨時搵妳解釋。」
V：「做乜啫，我同同學朋友食飯好正常咋嘛。」




管：「妳應該好清楚妳爹地有幾擔心妳識到啲壞同學然後學壞，尤其係妳轉咗校之後。」
V：「點會喎，Queenie佢哋都識嘅，小學已經見過啦！」
管：「咁妳係咪淨係同Queenie去食先？」