為了實現媽媽遺願，我成為了女兒國唐僧: K510

我：「欸…唔似喎，叔叔你望落重係好後生。」
管：「傻啦，保養得好啫，小姐個爹地都係我睇住大。」
我：「你退休之後，咪咁大間屋無人打理囉？」
管：「無可能啦，一定要請人打理，得一個工人搞唔掂晒啲嘢，不過請人最麻煩嘅係，做唔做得嘢係其次，要搵個信得過嘅先難。」
我：「明白嘅，話晒都要貼身服侍佢哋一家人。」
管：「你有無興趣？唔使讀書叻㗎，乜都肯做就得，最緊要唔怕全天候服務，大小姐佢實信得過你。」
我：「我？邊敢喎…唔好話讀書，其他嘢我都無嘢叻。」
管：「好多嘢唔使叻嘅，最緊要識搵到啱嘅人嚟處理，壞車就去搵車廠，屋企啲設備就搵工程師，買賣就搵公正行，好多時你只係企喺度睇住件事嘅發生。」
我：「哈…對我嚟講…已經覺得係超高難度嘅一份工。」
管：「我曾經都諗過如果唔係我亂打亂撞做到呢份工嘅話原本嘅人生會係點，可能會係一個體育教師？運動教練？球證？解款員？甚至可能只係一個保安或者司機嚟。但回想返呢幾十年嚟做過嘅嘢其實又真係無乜特別，好多時咪係一個司機，有時企喺部琴隔籬睇住個調音師做嘢，甚至係陪老細釣魚，大部份時間係瑣碎到唔知做緊乜，到最後就明白其實最重要嘅事務就係睇住少爺大，然後又睇住小姐大個，就係因為佢哋我先擁有我嘅家庭同其他所有嘅一切。」管家先生，我都知你將幽蘭嘅福祉放喺首位，但你同我講嚟做乜喎，我唔會打佢壞主意㗎。




我：「嗯，所以做管家…責任真係非常之重大。」
管：「對於我嘅工作嚟講，最大嘅回報就係見到大小姐佢嘅笑容，其他嘢乜都比唔上，真心希望佢嚟緊嘅學業生涯可以過得舒服啲，有時我都戥佢辛苦。」
我：「咁競爭大自然就辛苦，放鬆啲咪開心囉…」
管：「佢見返Queenie，又同埋你玩之後就好似開心咗好多，所以，你哋都算係我業務上嘅助手嚟。」
我：「吓…你唔好咁話我哋啦，我哋只係做返自己。」
管：「已經好好喇，起碼可以暫時逃避一下佢爹地對佢嘅管束，就算只係一陣，已經平衡返好多。」
我：「佢爹地對佢咁嚴格，睇嚟一定係一個由細到大都好出色嘅人嚟。」
管：「咁又唔係，佢細個嗰陣好反叛㗎。」
我：「吓，唔會呀…佢而家好似想個女每一步都跟足佢指示嚟行咁㗎喎，唔係咩？」
管：「喺好耐以前，就係因為少爺佢曳得滯，老爺先會將原本喺公司返工嘅我調咗去佢屋企睇住個仔，當時佢會考都未考就話想放棄讀書，重話對佢嘅家業完全無興趣，叫佢畀晒阿哥打理就得，激到老爺想抨佢出門口。」