為了實現媽媽遺願，我成為了女兒國唐僧: K483

我：「其實幽蘭同健仔都知，只要你控制到佢，唔差在多一個人知。」隨時以後課金唔使經啲食夾棍嘅平台。
Q：「咁點同，幽蘭係我最好嘅朋友嚟，而健仔…佢係知道當初陪你打機個女仔呃佢咋嘛，直播已經係後嚟嘅事，總之呢個唔得呀，佢會帶畀我麻煩㗎！好心你就勸下佢唔好睇直播女，咁樣無前途㗎。」
我：「妳叫我一個鹹濕仔叫人唔好睇直播女，有乜說服力呀，不如妳直接同佢講，毒販叫人戒毒先夠發人深省。」
Q：「好！為佢著想，一定要幫佢脫毒。」
我：「咁使唔使幫佢搵埋女朋友添呀？」
Q：「你係咪有好多貨喺手？有就整件畀佢等我唔使煩…」
我：「我自己何嘗唔係一條毒撚嚟…」講到貨源，唯一肯聽我講可以介紹下畀人嗰隻就係細蚊，但我暫時重未接受到自己嘅朋友同佢一齊，而且細龜對顏值要求咁高所以…
食得鹹魚就抵得渴，做得毒販就遇咗要俾黑白兩道追殺，因為毒販其實唔係黑人或者白人嚟，佢哋係商人，睇過教父就一定知道佢哋嘅兇險程度係同間諜或者臥底打和。
到咗第二日係SU內閣投票日，而聽日就係某強大國家嘅建國假期，anyways，我只係關心唔使返學同埋星期五紅日會令我返少咗日工；而健仔佢就繼續度周如年。
我：「食完飯…返去投票咯。」條友一路食飯一路背六國論，平時佢都係輕輕鬆鬆有七八字頭就算嗰堆嚟，睇嚟今次佢好刻意要攞到一百分。




健：「嗯，你真係俾個姣婆喂咗迷湯呀？」
我：「咁人哋叫到咪幫下手囉，等條數好睇啲啫，不如話你自己俾姐姐喂咗迷湯。」YY作為SU內閣嘅一份子，當然做下樣都要幫手宣傳，喺上堂前叫自己班投票，而佢有無去其他班幫手拉票我就不得而知喇，不過睇內閣IG自介啲like數就知反應唔錯。而我，就算無人叫都係要投嘅，因為如果我唔自動自覺只會為我帶嚟麻煩…
健：「閘住，我先唔識乜嘢姐姐，你唔好亂講。」
我：「你咪自欺欺人啦，星期一先背默你而家咁落力做乜，我驚你到時一隻字都寫唔到出嚟咋。」
健：「講乜呀你！信唔信我搵齋啡淋你！」欣姐平時鍾意飲咖啡，條友有樣學樣，類似我跟咗QQ飲可樂要走糖嘅原理，但一個男仔喺度飲齋啡實在係太唔夾。
我：「做乜呀你！啱啱先話完唔識邊個姐姐。」
健：「係，唔識，咁飲埋就返去投票啦。」
啲青春期嘅男仔，十個有九個都神神化化嘅…其實我都會諗，如果成個禮拜無得同QQ見又唔可以搵佢會點？一定好慘，不過我知道答案係我一定會搵咗其他女仔，YY又好，細蚊又好，真係腐敗如我…