為了實現媽媽遺願，我成為了女兒國唐僧: K482

龜：『點同，佢曾經應承過出嚟…同埋乃木坂唔係見唔到㗎囉，只要飛去睇演唱會就可以同佢哋接觸。』
我心諗喺山頂同佢哋接觸咁都算？不如睇電視好過。
我：『其實人哋講到見面都唔會出樣，不如你唔好執著啦，咁同平時睇直播有乜分別喎？』
龜：『點同！喺身邊會感受到！如果無分別，咁你哋所講嘅熄燈做愛係未同打飛機又無分別？！』俾佢咁樣一講又真係拋窒咗，不過佢好似有啲理解唔到我哋嘅意思，熄燈做愛係因為條仔唔想見到條女個樣啫。
龜：『係喎，其實熄燈未見唔到個樣囉。』
我：『咪玩啦，香港光害之都嚟㗎，你叫個商場為咗你熄燈呀，定係你要約人哋入深山？正常嘅女仔睬你都傻。』然而我都唔知自己做乜又喺度睬佢。
龜：『佢有時直播會戴口罩，如果搵個紙袋笠住佢個頭就肯定睇唔到，唔知可唔可以一試呢？』
我：『你不如問下可唔可以綁架佢重好…不過我知道，你確實可以搵個紙袋笠住自己個頭，咁就一定見唔到佢。』
龜：『又係喎，咁等同整盲自己，等我問下佢先。』
真係難為QQ要成日同呢啲神經病交流，不過受人錢財就要替人消災，我亦只能夠祝佢好運；不過我覺得佢至少無性騷擾人，又無直接問價，其實都唔算好差？




要知道網絡上其實係有無數咁多嘅怪叔叔，好少少嗰堆通常就係識魔法嘅，而衰嗰啲就全部係一條條識發光嘅…
Q：「我已經鬼死咁忙，你個好朋友又喺度攪乜鬼？」
臨近七點QQ終於返到嚟，唔知幽蘭又有無陪到咁夜呢？
我：「我啲朋友無乜邊個有好帶挈，唔知妳想講邊個。」
Q：「健仔話佢乜都唔諗，到星期六先算，點會係佢。」
我：「我已經好言相勸，叫佢唔好為難啲網絡妹妹，換下啲原味底褲或者私密部位相返嚟咪算囉，佢係唔聽都無辦法，妳試下鬧走佢囉。」
Q：「咁人哋對我咁好又有乜理由鬧走佢？」
我：「個傻瓜宅男對妳又有幾好呀？」
Q：「起碼有課金先…」
我：「唔怪得著到身光頸靚啲有錢人全部係好人嚟，既然佢咁好，不如妳認命出去見下佢咪算，等佢死心。」




Q：「唔要呀，見其他人無乜所謂，我唔要見坐我前面位嘅同學呀！」
我：「妳講嘢都幾矛盾，妳已經日日望住佢個背脊。」
Q：「都唔知有乜好見，開個app就可以聽我彈琴，為乜要親身喺我隔籬聽。」
我：「同意，唔覺得有乜分別，不過呢啲少男嘅性幻想妳又點會唔明，好好滿足下人哋啦。」
Q：「滿足佢唔係問題嚟呀！問題係唔可以俾識嘅人知我直播！」QQ啲口吻…就係帶咗套就做乜都無問題咁。