為了實現媽媽遺願，我成為了女兒國唐僧: K477

我：「咁我唔通推開妳咩…而我又唔係唔鍾意妳…」
V：「茜旎講得啱，有女送上門你一定（舌累）飯應。」
我：「邊係喎，妳唔好聽佢亂講啦，呢啲嘢有分層次㗎…惜下又唔會無咗忽肉嘅。」其實做埋都唔見得會。
V：「無呀，我有需要先會發生，唔輪到你揀。」
我：「我都無話要揀，妳…唔係又唔開心吖嘛？」雖然唔係想攞啲乜，但為表鼓勵我扶住佢膊頭以示支持。
V：「無嘅，喺度讀書幾好吖，壓力少咗好多。」
我：「我諗最重要係多咗幾個女仔陪妳玩啫。」
V：「即係咁喎，我話如果，茜旎佢有一日突然消失咗，到時你最鍾意會係邊個女仔？」
嘩，做乜突然問埋呢啲攞命問題？即係點，如果新娘不是我係咪就要小三係我？如果無咗QQ…我要搵人求救又或者同女仔講嘢嘅話，呢班首選當然係YY；無論當佢係主人又好，女王又好，朋友又好；雖然我對佢身體係有慾望，但好難講得出我係鍾意佢，同佢玩就無乜問題。而天王星呢，佢內內外外都好出色，我好敬重佢，亦覺得佢一定比YY好，但我唔敢喺佢身上有啲乜嘢情感，連掂下佢都會覺得有大壓力。Zilvia…其實我唔多認識佢，但我會覺得如果呢個世界得我同佢嘅話，同佢喺埋一齊一定好開心…萬一開發出佢嘅另一面，又高又白又瘦擘大大髀真係不得之了，而且喺安全感上好過QQ好多。
點算，但我面前呢個係幽蘭唔通佢想我答佢？女仔係咪都鍾意俾人哋鍾意？但呢個算唔算係種不倫不類嘅表白，即係妳係我第二鍾意嘅女仔，咁呀？而且，除咗QQ之外，我唔想自己再對任何女仔有精神負擔，尤其係佢嘅精神狀態都係嘛嘛地。




我：「佢消失咗，我就無晒包袱…與其話最鍾意邊個，我可能會想多啲搵個EX先，多啲陪佢一齊溫書，以前我累到佢荒廢學業所以成績好差，唔想佢再係咁樣。」
我認我係逃避，而家嘅我當然無可能好鍾意細蚊，就算佢話同我做好朋友無問題，我都驚會再次對佢做成傷害；而且佢讀唔成書其實又關我乜事吖，呢啲係環境同天資問題，就算唔係我都會有另一個人阻礙佢，亦已經出現過。
V：「嘻嘻，你肯定驚我話畀佢聽，雖然真係好可能。」
我：「唓，佢又唔係我邊個，我做乜唔可以鍾意第二個，況且佢應該無咁多心機關注我鍾意邊個。」我扮到一啲都唔著緊咁。
V：「咁你認為，啤牌金字塔係咪可以無限地搭高？」點解呢個女仔咁跳脫，永遠都估唔到佢下一步想點嘅？