thriXt Qantasy 純文字安眠之作 (New: - U2K - 一直上架): K453

我：「妳都成功解決咗一個問題，做乜重咁心煩嘅？」
Q：「嗯…解決咗一個，但係重有另一個吖嘛。」
我：「嗰啲…慢慢嚟啦…有啲嘢唔係下下靠蠻力就得。」
Q：「可唔可以識多幾個欣姐，麻煩佢幫手同啲傻瓜破處，咁樣或者可以解決到個問題。」
我：「又唔係我特登識返嚟嘅…佢呢啲真係萬中無一，就算貞姐應該都唔會好似佢咁啦。」
Q：「其實男仔係咪都係咁傻瓜，會咁容易就沉一個女人？」
我：「我覺得呢啲嘢睇人嘅啫，妳都識講佢哋無經驗。」
Q：「咁又係，邊似得你吖，花心鬼！」明明我一個女朋友都無，咁都要話我花心，真冤枉。
我：「邊有喎，做毒撚幾好吖，可以客觀冷靜咁睇到其他女仔，然後再欣賞佢哋。」
Q：「鬼唔知你好想欣賞阿貞嘅裸體，分明係我阻住你，先會擒完人哋都無得食，然後唔抵得阿健。」




我：「妳唔好聽欣姐亂噏啦，我只係攬住輕輕咁嘴咗下，同埋阿貞佢有男朋友㗎喇，我邊似得健仔咁好性福。」
Q：「哦，原來唔係我阻住你，係人哋條仔阻住你。」
我：「無囉，呢啲嘢諗下就得…就算係…都會忍住。」
Q：「唔聽呀！你都惜咗人哋！」佢講完就跑開咗。
攪乜喎，妳係呷我醋定點？其實妳當我係乜唧，係咪只係一件附屬於妳嘅物品而要聽晒妳話？明明妳又叫我去識女仔…我衝前捉返實佢隻手，佢想捹開但捹唔甩。
我：「嚟吖，帶妳去一個地方。」
Q：「去邊呀？唔好諗住我好蝦喎，就算無姐姐幫你洩慾都唔可以對我夾硬嚟㗎，呢度周圍都係人。」都唔知呢個女仔諗乜嘅，要強上晚晚喺屋企都得啦，邊有得妳反抗。
我：「哎吔，想請妳飲嘢咋，見咁耐無嚟過。」
Q：「咁好死，唔好以為一杯黑朱古力就可以收買我。」
我：「知妳鍾意飲咋，重記唔記得嗰陣好艱難先令妳有餐飽飯食，但妳都要飲朱古力…」其實只係九個月前…




同一間鋪，同一杯朱古力，但我諗啲店員都已經唔同晒；攞完杯朱古力今次我打開個蓋咬走一大嚿cream先，因為知道佢唔多鍾意，而且唔需要再擔心尷尬嘅問題。
Q：「喂，你做乜眼甘甘咁望住我飲嘢！」
我：「無呀，只係見到妳好似好滋味咁。」
Q：「無呀，你話請我飲㗎，我係唔會分畀你㗎，自己鍾意飲又唔去買多杯。」
我：「哈哈，呢啲嘢飲一啖仔最好飲，多嘅就會膩㗎喇，我未至於鍾意飲到咁，兩杯太浪費喇。」