為了實現媽媽遺願，我成為了女兒國唐僧: K438

我：『絕對唔係妳呢兩個假設，雖然係同感情有關。』
貞：『點呀，我唔識教你溝女喎，你都唔使我教啦。』
我：『我梗係唔使…但今次唔係問我嘅嘢，係關於妳個好朋友欣姐，我都唔知點開口好…』
貞：『乜事？你想溝佢？我哋無一齊住無之前咁熟喇…』
我：「Queenie，阿貞搵咗我喇，我唔知點同佢講好…」
Q：「係？！等我睇過…作死你呀！喺度同人打牙骹？係咪想激到人哋唔理你先安樂！」佢一嘢敲（亨）咗落我頭殼頂上面，發出咯嘅一聲。
我：「如果佢當我friend就應該唔會嘅…不如妳幫我打字啦，我唔知點開口好，都唔關我事嘅。」
Q：「重打字？你好禮貌啲問佢可唔可以打電話畀佢啦…呀，你直情同佢講係我想搵佢謦啦，咁樣好啲。」
我：『唔係我…或者，請問可唔可以打畀妳，其實係我身邊個女神，Kuromi佢有啲嘢想同妳講。』
貞：『…可以嘅，我都係一個人喺hall。』




然之後女神就用我電話打畀人哋，開喇叭免提嗰隻。
Q：「阿貞唔好意思呀，咁突然搵妳，因為我知得妳先幫到手。」呢啲咪叫強人所難囉。
貞：「咁…唔知係乜事呢？Kuromi…」
Q：「我直接講啦，就係我哋個朋友健仔佢同阿Yan炒大鑊，而家無人搵到佢所以想搵妳幫手，唔知阿Yan佢有無同妳提起過呢？」
貞：「吓…乜嘢炒大鑊？即係點？佢完全無同我提起過你哋喎…呢兩個禮拜我同佢見咗一次咋，就係前日一齊食lunch，剩係謦下大學啲嘢，佢個樣好正常無特別。」
有句諺語好似叫乜神女無心，傻郎有意…
Q：「咁呀…嚴格嚟講佢哋兩個都叫一齊過嘅，如果佢無同妳講過都唔緊要，其實唔關妳事嘅，只不過我有少少嘢想同佢講，唔知妳方唔方便畀佢聯絡方法我呢？」
貞：「真心咁講，其實你哋只不過係中學生，我個人就唔建議你哋對佢太過上心，無謂執著…我唔清楚件事亦唔想講呢個或者嗰個唔好，只不過事實就係咁。」
Q：「其實我明㗎，個廢柴同阿欣又點會有將來吖…之不過呢，有啲嘢唔做嘅話我會過唔到自己嗰關，所以先嚟搵妳希望幫到我。」
貞：「妳明就最好，都知妳係世界女嚟，不過妳都要知道喺我立場係唔應該亂咁將佢電話講畀妳知，件事又唔係死人冧樓，我同佢亦都唔係熟到可以幫佢負責，或者咁啦，Kuromi妳留個電話畀我等我forward畀佢話佢知妳有事搵佢，睇下佢打唔打返畀妳囉，我剩係做到咁，希望你哋唔好太高期望，如果無回音嘅話再搵我都幫唔到任何忙。」