為了實現媽媽遺願，我成為了女兒國唐僧: K437

我：「我都相信得，但為乜要咁做，既然都係喺game入面搵人，其實妳可以喺對戰紀錄或者工會頁面入面搵到欣姐，直接私訊佢唔係一樣咩？」
Q：「你估我無試過咩…」乜原來右女神妳咁幫得手㗎？
我：「結果如何，食檸檬？」
Q：「我都唔知，睇返紀錄佢近呢幾日都無on過game，即係同個傻仔炒咗之後，我唔知佢睇唔睇到通知。」
我：「由得佢哋啦，都幫唔到啲乜，反正唔會有結果。」
Q：「唔試過點知？有無聽過壞結果都好過無結果？你而家唔幫下佢，到你出事嗰陣點叫佢捐個腎出嚟畀你？」
我：「妳…係咪喺度咒緊我會腎虧，我諗我機能尚算正常嘅…不過妳咁機心㗎，先生教施恩莫望報㗎。」
Q：「我係咁㗎喇，係咪唔鍾意我吖？去搵人啦。」
我：「知喇，我得閒開game就順便問佢啦。」
Q：「重等得閒，而家就即做啦。」




我：「上次玩已經係嗰晚party，又要update先…」
Q：「Up啦，你而家有嘢做咩？唔好喺度扮溫書唔該。」
我：「使唔使咁急呀…」
Q：「有無聽過打鐵趁熱，呢啲嘢攤凍咗一個禮拜就乜都無㗎喇，幻想下你喺間bar度識到一個啱謦嘅女仔，你會唔會因為聽朝要早起身返工返學而同佢講下個禮拜先再約出嚟玩，你估重會唔會有下文？」
我：「乜妳鍾意啲咁猴擒嘅男仔㗎？會有好結果咩？」
Q：「咪試下畀一個禮拜我考慮囉，睇下會有乜結局？」
嗯，QQ講嘅就係硬道理，女神之言，係聖經，係神喻，係福音，係啟示，係神聖不可侵犯，係可以號令天下，係可以傳頌千古留芳百世。小人莫敢不從，乖乖更game。
我：「其實點解妳唔直接搵人哋？」
Q：「我同佢都無乜兩句，同埋你受女仔歡迎吖嘛。」
咁樣老屈我都得嘅，家陣我有無揸住成堆女任揀先？




我：「咁…我要同佢講啲乜呀？」
Q：「你認真啲話有嘢想問佢啦…記住留contact呀，你都唔想廿四小時開住隻game睇下佢有無覆㗎。」
貞姐講過佢唔係成日玩，又或者佢會懶得理我，所以我都無乜寄望會好快收到回音；但好好彩地，我喺第二日嘅夜晚就收到姐姐嘅訊息…
貞：『死仔包搵我乜嘢事呀？』佢親切咁叫我做死仔包，無扮唔識人，而且重附送一個白眼emoji，睇嚟姐姐實在係幾好人，攪到我有啲羨慕個傻仔添。
我：『其實係咁嘅…今次有啲認真嘢想問下貞姐姐妳。』
貞：『你牛高馬大咁，唔使加姐姐喺後面！唔該！』
我：『我都知搵得妳太突然，希望妳唔好介意…』
貞：『唔介意，但第一，我唔受溝，第二，如果你失戀或女神唔要你唔好搵我，唔要吸負能量，唔傾感情嘢。』