為了實現媽媽遺願，我成為了女兒國唐僧: K411

健：「都已經上過去，再玩已經唔係為咗隻game…」
我：「我有其他更有意義嘅嘢要做…」
健：「Queenie…我有個不情之請，可唔可以…幫我打句嘢畀佢，等佢解封咗之後可以睇到，我唔知講乜好…」
Q：「哈，好嘢呀下，溝女學人出貓。」
健：「我唔想再錯落去，唔敢自己亂打嘢畀佢…」
Q：「如果我幫你做埋呢啲咁缺德嘅事，就連自己都驚俾天收，要我出賣靈魂好應該收貴啲。」
我：「嘩，妳咁都得嘅？人哋幫妳打機一個鐘得廿蚊，妳幫人打一句嘢就收貴啲，咁又唔驚俾天收咩？」
Q：「講笑咋，搦嚟啦。」然後就高速㧻㧻芒。
健：「乜咁樣…真係可以嘅咩…」
Q：「唔知㗎，佢unblock你先算啦，你低低BB咁打呢啲先似你㗎嘛，太專業係人都知你做假啦。」




健：「我錯囉…咁…我都唔阻你哋，返屋企先喇。」
如是者，垂頭喪氣嘅健仔就離開咗我哋嘅屋企。
我：「妳…好似預知到佢遲早會有呢個結局咁嘅？」
Q：「正常不過呀，佢都無乜識過女仔，又點會識氹人，唔激嬲人哋就假啦，欣姐呢啲擺到明又係老司機嚟，又點會真係睇得上呢個傻仔，貪就手玩下啫。」
我：「嘩，女神講嘢夠晒狠，一嘢就批到佢一無是處。」
Q：「唔關事嘅，兩個都唔同background，佢應該識返啲同自己差唔多嘅人嘛，好似阿康同韻婷咁咪幾好。」
我：「呀…原來妳都有聽聞過？」
Q：「你係咪認為我哋學校好大呀？佢兩個本身又唔係social開嗰啲人嚟，有乜嘢風吹草動係人都睇到啦，加埋佢哋重度缺愛，個樣面容扭曲晒到寫埋喺額頭添喇。」
我：「原來係咁，經驗老到嘅女神果然觀察入微。」
Q：「邊似得你，我到而家都喺度懷疑緊你係咪專登辣㷫天王星，然後再以退為進輸比佢，睇你個樣都係M底多。」呢層…嗰陣卡車換細蚊我咪屬性轉換囉。




我：「點會喎，天王星呢啲同佢做朋友比較好。」
Q：「你算吧啦，個個女仔你都話係普通朋友嚟㗎啦。」
我：「唔係呀，係朋友咋，並唔係普通…」到底講緊乜。
Q：「你鍾意囉，有本事咪搵多啲後宮，我唔得閒理你，不過我勸你唔好蝦我啲姐妹，如果我知道咗一定唔會放過你，雖然呢個本身就會收拾你。」
我：「呢啲事，係絕對唔會發生嘅，我而家心無雜念，只係想專心讀好啲書。」講真，唔好話戀愛，單單係應酬佢身邊啲女仔已經虛耗咗唔少精力。
Q：「聽日星期一喇，做晒功課未呀？專心讀書…」本來諗住今日全日得閒，結果俾個傻仔滾攪咗大半日…
我：「係係係，即刻做…橫掂我唔使錢就有貓出。」