為了實現媽媽遺願，我成為了女兒國唐僧: K384

放Lunch享福我當然唔係未試過，就算扑埋又點話呢？但事到如今唔通約細蚊上嚟一齊食咩…正當我諗住買盒燒臘飯返屋企頹食嘅時候，行行下見到個孤獨嘅身影。
我：「我嘅好同學，得你一個人嘅？」
龜：「係呀，得我一個，你都係。」
我：「個肥仔做乜今日唔陪你嘅？」
龜：「佢係環保及園藝學會，今日到佢值日，要上去天台淋水翻土，順便食麪包減肥。」肥豬玩啲嘢夠晒九唔搭八，種菜推鉛球呢啲孤獨精先會做嘅嘢，但係佢又好似有幾多朋友，可能係以貌取人嘅關係…又，做乜無端端減肥？相比起以前佢已經好睇咗好多，中一嗰陣佢直頭可愛過吉百利㗎，而家望落就厚肉大隻肥，亦高咗好多。
龜：「你個好朋友夠唔陪你咯。」
我：「佢屋企人召喚咗佢返去啫…你諗住食乜？」
龜：「諗緊去便利店食，順便儲印花。」
我：「吓，今期換乜呀？你竟然要儲印花？」
龜：「Sanrio囉。」




我：「你啱乜呀？青蛙定XO雞？」我專登唔踢爆佢。
龜：「我都唔知，睇下抽中乜囉。」
我：「咁一齊囉，我可以畀埋個印花你。」
雖然話行去便利店，但經過間車仔麪又啱啱有位，我哋望咗兩眼就決定改變主意行入去坐。
其實呢，食車仔麪都好睇到一個人性格係點㗎，佢就點咗魚蛋、芝士腸、煎蛋、冬菇，而我就係牛腩、牛栢葉、生腸、豬紅；學生晏晝食三餸變四餸，而生腸就唔知間鋪去邊攞返嚟，呢啲罨耷鋪頭永遠有好多神奇嘅事發生。
我：「唔使儲印花啦，你睇啱邊隻我可以幫你收。」
龜：「咁又唔使，其實無目標。」
然後就dead air咗，開始食我哋嘅麪；上次阿健攪到雞毛鴨血，令次呢個宅男又嚟自投羅網，我諗…或者可以做返少少嘢嚟幫下佢，話晒佢係其中一個唔會眼紅我嘅同學…
我：「呢排…心情唔係咁好？」其實佢平時粒聲唔出，喜怒不形於色，普通人㞗知佢乜心情，理佢嘅人都唔多。
龜：「少少咁啦。」佢個樣似唔想講。




我：「頭先…你份說話練習做得幾好呀，起碼唔會有人笑你先，又可以同女神一齊做功課，唔係幾開心咩？」
龜：「有乜咁開心，我都唔鍾意佢哋。」屌…個個喺現實都唔多妥佢哋，但一到虛擬世界就做晒裙底獸。
我：「幫你寫埋稿，又教埋你講，都算係咁啦。」
龜：「啲女人咁假，佢哋最驚我講得唔好拖低啲分咋嘛，我又無所謂，同你一組都得。」