為了實現媽媽遺願，我成為了女兒國唐僧: K383

呢種公開處刑確實幾殘忍下，Miss一路聽就一路同我哋講返有啲乜需要改善嘅地方，普遍嘅例如有懶音呀，聽得出照稿讀無乜語氣呀，譯得唔好講埋啲書面語出嚟呀，明明武俠打鬥緊講到好似辯論咁呀，重有食螺絲走音等…
等咗好耐嚟到我同幽蘭嘅作品，我聽到第一句已經覺得有啲唔妥，跟住QY兩隻亦都即時擰咗個頭嚟望住我…
有幽蘭做監導份成品當然唔會差，問題係…好似好得滯，頭先段段錄音都係功課feel，但而家播緊嘅就好似親歷其景見證住一對戀人喺度嗌架咁，佢揀嘅章節係成本小說最激情澎湃嘅一段，而唔知點解當日我哋又好好感情；短短三分鐘唔夠，聽完之後連Miss都面露詫異。
「嘩…咁好感情，睇嚟會玩出火喎…」
「點解呢條友可以日日喺花叢入面玩得咁開心？」
「你有無聽書㗎？人無恥便無敵呀！」
「唔好講咁多喇，一陣東西宮大戰呀…」
「點分東西先…你肯定知道邊邊先係正室？」
鄧：「咳咳，兩位同學嘅表現非常好呀下，語氣同聲線都非常有感染力…講返佢哋嘅作品係出自法國大文豪小仲馬嘅成名作茶花女，喺世界文學作品入面擁有舉足輕重嘅地位，被稱為三大青春悲戀之一…」
雖然俾佢輕輕帶過，但我諗已經喺其他人心入面留下咗不能磨滅嘅陰影…如果再咁攪落去，我真係會唔掂…




最衰都係班主任，分明一開學就要陷我於不義。
而幽蘭就因為受到讚揚而表現得十分開心，完全無理過其他同學嘅閒言閒語，好在佢同QQ係由小學識到而家關係非比尋常嘅姐妹，如果唔係夾喺中間嘅暗湧夠將我捲死…
雖然啲女神無再講啲乜，但由佢哋嘅神情都睇得出佢哋feel到我同幽蘭有啲特別，尤其係YY啲眼神就古古怪怪咁；做乜啫，唔通我做妳隻狗就得，同人哋做功課合作無間就唔得？我同妳好似無乜關係㗎咋喎。
雖然佢係唯一同我打過茄輪同睇過對方下面嘅女神…
我：「今日食乜呀？」
健：「我要飛的去又一城呀，唔得閒陪你。」
我：「使唔使咁開心呀，一粒鐘唔夠都要見？」
健：「人哋天地堂攞定位等我呀，邊夠你開心，你揀是但一個陪你喫飯都得啦！」然後條契弟就跑咗出去。
或者佢講嘅係事實，除咗Zilvia之外我約是但一個女神睇落都問題不大，但問題係佢哋成日一齊食，唔通我要攝落去做佢哋玩具咩，亦盡可能唔想影響佢哋聲譽。