為了實現媽媽遺願，我成為了女兒國唐僧: K351

我：「傻豬，點會喎，可以睇到妳開心生活就係我生存嘅意義同支柱，因為有妳喺度…先有而家嘅我。」
Q：「傻瓜，返工畀心機喇，唔好打爛碗呀。」
或者…我真係有做呢行嘅天份，返咗咁耐工一隻器皿都無打爛過，只係見到啲崩咗或裂咗會問馬叔叔揼唔揼。
Q：「死仔…你個鬧鐘…好嘈呀，仆街…」
媽咪呀！好眼瞓…早知會咁陰功我就落力啲打啦。
返咗咁耐學我都未試過提早咁多，而且重要係第一次早過QQ起身，我為咗提神就行埋去QQ張床度。
我：「可唔可以惜一啖先？」
佢指一指自己塊面就繼續瞓，我輕輕印咗一下就去洗頭…到我換緊校服嘅時候QQ就起身，啱啱好喺最唔合適…
Q：「無人得閒睇你條朘呀，收皮啦。」平時都係佢出門口先，所以慣晒喺廳捹捹下著校服。
Q：「就夠鐘喇，快啲啦…呀，你好似多咗毛…」




又話唔睇，正一衰豬，然後佢就入咗去廁所；我就趕住出門口仆到落去，重急過平時最後一分鐘。
衝到去校務處前面我發覺有堆學生排緊隊，以前嘅我從來都無留意過一間學校係點開門運作，真係辛苦晒。
我：「咦…天王星，妳重喺度嘅？」
U：「大佬，我點知你醒唔醒到㗎，如果你失約攪到無人開課室門嘅話啲人咪又鬧埋我，唔喺度睇實你點得，雖然已經遲咗一分鐘，不過都算你守信用啦…書記姐姐，唔好意思呀，呢位同學話呢排想提早返學校溫書，所以會幫手朝早開門，麻煩同佢登記下吖。」原來重要搞咁多嘢，又係嘅…如果個個都可以借匙嘅話，書記又點認得晒全校咁多位同學，到時俾個三唔識七借走偷晒啲嘢點算。
開完門就攞點名紙寫日期同剔，呢啲嘢唔難做，只係好花精神同時間，都唔明點解會有人自薦做班長攞嚟煩。
我：「妳成日做班長，一路以嚟都辛苦晒喇…」
U：「呵，乜你終於都識體諒人喇咩？嚟緊幾個月靠晒你喇喎！」有乜體唔體諒喎，妳哋讀書叻，受先生歡迎，想學乜嘢興趣都得，呢啲嘢又關我乜事，每個人都有各自嘅難處㗎啦。
一入課室，Miss Tang就氣沖沖咁衝入嚟。
鄧：「喂…你兩個攪乜呀？我收到風訓導叫我關心下你兩個，你哋無事吖嘛？」
U：「無事呀，我哋只係進行咗一啲合理嘅課外活動，同同班同學交流下增進感情。」虧佢講得出口。




我：「訓導都唔做我哋，即係無事啦，啱唔啱？」
鄧：「班長妳講乜我信妳㗎，唔使好心幫呢條友。」
U：「無嘢喎，我身為班長同風紀，自然會確保返身邊嘅同學遵守校規維持秩序，我而家要去當值先喇。」
鄧：「死人爽，我知你同啲女仔好friend，但求下你唔好同佢哋玩得咁癲呀，出咗事無人保到你㗎。」