為了實現媽媽遺願，我成為了女兒國唐僧: K343

然後阿健就陪我一齊落去一樓嘅多用途活動室…天王星今朝一早就用咗準社長嘅名義book咗呢度嚟同我決鬥，其實呢度係一間二合一嘅課室，中間有隔音摺板分開，平時會攞嚟做中六流動班班房，或者臨時班房，啲枱係奇妙嘅半六角形，另外亦都係一個小禮堂，演講室，鏡房…
不過今日就變咗做恐懼鬥室，雖然可能得我一個驚。
一入到去就已經見到YY喺度鋪瑜珈墊，應該係天王星叫佢咁做，而QQ就撓埋雙手乜都唔理，在場嘅人士越嚟越多，主要都係我哋班同修ICT嘅同學，易同學嗰幾隻契弟當然喺度，考第一又可愛嘅周B都喺度，但書蟲女兼風紀隊長就唔喺度，可能係睇唔過眼自己啲下屬放咗學喺度撩是鬥非，咪係囉，家陣玩明朝東廠西廠咩…
等咗陣，天王星已經換好全套道袍行咗入嚟。
好彩佢重係啡帶…黑帶嘅話我一定會好驚驚。
我：「女班長…有無必要咁認真呀？」
U：「我哋而家唔係打架，係比試，你無學武術當然點都無所謂，但我係應該要做返足嘅。」點解啲女神個個都咁勻洵，如果有兇徒襲擊妳嘅話係咪要先舉手叫佢停一停，諗一諗，然後再慢慢喺佢面前換衫。
我：「OK…咁…係咪整跌對方就算贏？無其他限制？只要唔打傷對方…」
U：「嗯，不過由於你件校服一扯就爛…所以我哋雙方都唔可以扯衫，明唔明白？如果你有需要嘅話可以換衫。」
我：「唔使喇，從來同人打都係著校服多…不過你畀膽我都唔敢扯妳件衫啦，我做人都有返少少底線嘅。」




U：「你又唔使咁驚，我入面一早打晒底。」佢拉開咗少少件開胸道袍，見到入面有件黑色緊身衫，類似殺手先會著嗰啲，明明一個靚女點解攪成咁…
U：「咁個範圍就喺中間呢啲墊上面，你OK呀可？盡量唔好影響到其他人啦，你唔會需要牆壁做牆技㗎可？」
我：「對唔住，我未學識忍術，一切從簡就得。」
U：「咁你除埋對鞋就可以開始㗎喇。」佢唔講我都差啲唔記得，打爛仔架對皮鞋永遠係最好用嘅武器，鞋跟一下hook落去係痛過赤腳好多。
U：「喂，你唔除襪呀？跣死你呀，著住真係無可能贏㗎喎…」咁多人睇住我除呢除路，怕醜啫…
點知呢個時候我後面響起咗一把唔生銹嘅聲音。
易：「嘩，阿爽你係咪想用臭腳毒氣攻擊？勝之不武呀！」然後我面前嘅女班長一嘢凌厲咁睥住我塊面側邊，成個活動室又再次回復返安靜。