為了實現媽媽遺願，我成為了女兒國唐僧: K339

U：「你講乜…嘢呀？」我知佢想填詞咁fill個撚字喺中間，但礙於呢度始終係班房佢無咁做到。
我：「我係話我會負責整返部機，如果整唔到我會直接同阿sir講認錯，妳唔需要擔心。」
U：「我係話，你啱啱叫我乜嘢呀？！」
我：「我想講，暴力係解決唔到問題，我見妳嘅眼神就嚟好似想一嘢劈斷個手送tray咁。」
U：「唔係你條粉腸整到jam紙我使咁樣？我邊忽暴力呀？」
我：「我認我低B同懶攪到jam紙我都唔想㗎，咁我咪喺度整緊囉好無？但妳粗暴咁對部機都係事實嚟，大家有眼睇住㗎，空手道並唔是咁用的。」
U：「你識分乜叫武術乜叫暴力㗎可？」
我：「我係低B，但我都重識分嘅，用嚟保護弱小，自衛，強身健體，競技嗰啲就叫武術，用嚟蝦蝦霸霸，以為拳頭可以解決問題，將情緒發洩出嚟嗰啲就叫暴力，你唔使問我，不如問下手上面張碎紙乜叫暴力。」
U：「再問你一次，你係都要咁樣定義我吖嘛？」
我：「做乜啫…暴力咪暴力囉，我以前由細到大都打開架㗎啦，不過…女仔始終斯文啲好啲嘅，我認為…尤其係女仔點操練都未必打得過男仔，呢個係天然問題嚟，以為自己好好打其實一啲著數都無而且重好危險。」




U：「你好嘢呀下！重要性別歧視添？係咪以為呢個班房無乜女仔就可以亂講嘢？」
我：「女班長…不如冷靜少少啦，我哋係讀理科㗎，男同女嘅生理結構唔同，肌肉量同骨架都唔同，呢個係客觀現實嚟囉，點會構成歧視呀？妳見全世界所有武術比賽都係分男女同磅數都知乜事啦，妳覺得唔妥不如去平機會投訴先，我就唔會要求終院俾我留長頭髮返學嘅。」
U：「好吖，你咁有信心吖嘛？同我打返場囉！」
我：「黐線，我係唔會打女人㗎。」
U：「你唔係不朽黐線嘅咩？係唔會打定驚打唔過呀？」
我：「哎吔，我怕咗妳…如果妳覺得我好唔妥嘅話，我而家可以硬食妳一拳唔會反抗，當我錯，當我輸，好未？」
U：「唔得，咁嘅話以後咪全世界都嗌我暴力女？我唔會咁蠢，就唔使你打女人，我哋嚟競技咁好未？」
我：「好好好，包剪揼一鋪定輸贏，嗱我出剪㗎…」
U：「聽日我放學會book活動室，好簡單，邊個膝頭或者pat pat掂地先就邊個輸，你唔好走咗去呀。」
我：「有必要咩…剩係計呢兩個部位？」




U：「係，我理得你喺度做掌上壓定拱橋，甚至乎側手翻或者用頭頂break dance都得，如果你認為有呢個空檔俾你做呢啲動作。」