為了實現媽媽遺願，我成為了女兒國唐僧: K338

如果係Chem Lab嘅話應該已經好好彩咁發生大爆炸。
一排四個位，我嗰行係細龜，健仔，我同天王星，講真我同Uranus唔熟亦無乜兩句，但由於無乜女仔修電腦嘅關係佢迫於無奈同我呢個QQ嘅親信坐。佢係一個計數好勁嘅女仔，打空手道嘅女仔，就連對住部腦打字都好有氣勢…我唔係太想理佢，比起Zilvia我更加怕咗佢。
幾經辛苦我終於砌完個封面頁印出嚟，咦？無晒紙…
我：「哎吔…陰功咯，jam紙添。」望住printing嗰盞燈由綠色變咗做橙色，我就知實有排煩。
U：「頂你！你係咪盲㗎？側邊咪貼咗張紙寫住個手送tray有問題囉，你重走去用？！我未印完㗎！」
無錯…每行一部laserjet share嚟用，而家成行停晒手。
我：「張紙啲字咁細隻又甩色，我睇唔到吖嘛…」
U：「你係睇唔到啲字啫，唔係睇唔到張紙呀？唔識哄個頭埋去睇嘅咩？你有無懶成咁呀，連打開個tray加紙入去都懶？」有呀…我真係懶到諗住攝張紙去側邊就算…亦懶得研究嗰張label寫乜，咁就出事兼俾佢講中埋。
我：「有啲嘢…唔試下…做實驗點知真定假呢，都有可能…其實部機已經整返個師傅唔記得撕走張label…」
U：「咁個結果係點呀？可唔可以唔好為你呢啲不負責任嘅行為嚟搵藉口？」




我：「Sorry囉，我唔會唔負責任嘅，整返咪係囉…」
其實都係意外嚟啫，雖然可以避免…女班長妳使唔使惡死睖瞪咁望住我呀？佢頭先把聲都幾大聲下所以全個班房都知乜事，但大家都知佢嘅惡名昭彰所以就無加把口嘞，只係安靜咁喺度偷望食花生睇我出醜。
我打開個前蓋望一望，呢啲機同屋企用噴墨機好唔同，入面啲結構密密麻麻唔會俾你見到張紙晾住喺中間，有好多轆轆咁嘅物體重有啲撥桿咁，我諗要拆走某啲嘢先可以release返張紙出嚟，今次我終於小心翼翼睇清楚面板蓋後面啲四格漫畫研究下點樣拆開部機…
U：「得未呀？麻煩友！」
我：「我搵緊條桿要扭去邊，個墨盒扣死咗嘅。」
U：「妖！靠你真係死得，扯張紙出嚟咪係囉！」
個出紙位突咗條紙邊出嚟，佢用手指鉗實用力一掹…
U：「屌…頂你個肺…」唔使問阿貴都知道…張紙裂開咗，佢只係掹咗三份一出嚟，我喺前面睇張紙就完全咁攝住喺啲轆轆中間…即係越攪越禍。
Louis嗰幾條仆街見到，忍笑咁噗咗出嚟；而膽小嘅阿健同細龜當然粒聲唔出繼續望住個mon。
我：「阿女班長，暴力女…咁樣解決唔到問題㗎喎，不如妳借住第二行部機印先啦，我會喺度慢慢整。」