為了實現媽媽遺願，我成為了女兒國唐僧: K332

我：「真係唔使喇，唔好當我細路仔啦…」
V：「乜呀，係你要幫我食呀。」
我：「雪糕放成年都得啦，怕肥咪由得佢哋喺度囉。」
V：「唔係呀，係你要食雪糕，然後我就會開心。」
我：「我係鍾意食雪糕…但點解係妳會開心？妳好唔想見到佢哋存在喺雪櫃咩？」
V：「因為你食雪糕會開心，而我見到你開心我就會開心，所以你為咗要令我開心，要幫我食雪糕。」
咁如果…我話射啲細胞入去妳身體入面會好開心咁會點？
我望住大概三乘四乘五嘅雪糕杯山，睇怕就乜味都有咁滯，杯杯上面都寫住啲深到死嘅英文，看圖識字好過。
我：「咁…我就要呢個…乜鬼嘢合桃啦。」
V：「呢個係楓糖合桃呀，攞埋側邊隻羹啦，去上車喇。」妳真係好可愛，如果要日日對住妳嘅話…




離開咗大屋，一個人上返去佢架返學車，坐喺老細位度開開心心食雪糕，幽蘭就揮揮手同我講再見。
管：「多謝你今日嚟陪小姐，以後多啲嚟玩啦。」
我：「欸，咁啱要分組一齊做功課啫，真係辛苦晒你，攪到咁夜先有得放工，唔好意思。」
管：「唔好咁講，辛唔辛苦係睇你返工要做啲乜，而唔係幾點放工，當你做啲好唔願意做嘅嘢嗰陣先會想快啲做晒啲嘢趕住收工逃離地獄，如果你返工搵到你嘅價值同埋意義，就唔會太過關注幾點先有得收工，因為其實有乜好趕呢？你生命中有乜嘢值得你去咁趕，除非你放咗工之後有啲更有價值同埋意義嘅嘢要去做。」
我：「欸…明白，好多謝你今日嘅接送。」
管：「小姐話送到你返去學校就得，啱唔啱？」
我：「嗯，學校馬路對面放低我就可以，唔該晒。」
十分鐘就已經返到屋企附近，計埋五分鐘用嚟等紅綠燈，可見我同佢屋企其實好近，行都行到過去，不過感覺上係無一條直路要兜來兜去先到。
唉，蠢咗添，其實咁快返到嚟我可以留返個雪糕畀QQ食㗎喎，雖然個雪糕係好好味，但一諗到得我有得食就唔係太開心，於是傻仔咗嘅我又仆去超市搵髦紛霹雪糕…
唔知QQ鍾意食乜味呢？就你啦！乜乜乜raspberry。




丁屎咁大(die)杯雪糕，咁就廿五蚊，拍得住OK飯連嘢飲，認真恐怖，不過一次半次就算啦。
我：「返嚟喇，嗱，呢個請妳食吖。」
Q：「嘩，你搞乜鬼呀，做乜買啲咁貴嘅嘢，定係幽蘭托你運過嚟㗎？」
我：「嗯…佢請我食咗杯，我想妳都有得食，所以就啱啱喺樓下買咗杯畀妳食。」
Q：「你…下次實際啲買Haagen Dazs家庭裝得喇，算你啦，好在你唔係買雲呢拿朱古力嗰啲。」
我：「我未至於咁蠢嘅，嗰啲隻隻牌子都有。」
Q：「好味道…喂，你做乜眼甘甘咁望住我食。」
我：「妳食雪糕要開心啲，笑啦。」