thriXt Qantasy 純文字安眠之作 (New: - U2K - 一直上架): K331

點解佢同QQ可以差咁遠？隻Q有時實際到好似愛情經濟師咁…如果你問我愛情所帶嚟嘅眼淚係咪有價值呢…我只可以話我好好彩，大卡車同細蚊嘅離開令我可以睇清楚自己，再加上右女神之後對我嘅影響，實在慶幸而家見返兩個EX可以有講有笑，雖然睇唔到我哋會有機會喺返埋一齊，但佢哋喺我心入面係佔據住一個重要嘅位置。
我：「傻瓜嚟嘅，妳明明已經成日喊。」
V：「點同，嗰啲只會係痛苦嘅淚水。」
雖然覺得呢個女仔有啲神神化化，但我主動惜咗落去。
未至於好激動，但係有用力啜實佢嘅嘴唇。
我：「我嘅愛情都係一樣咁自私同埋貪婪，我只係想惜晒身邊所有嘅好女仔，左女神，希望妳唔會成為背叛我嘅茶花女啦。」
V：「嗯！一定唔會！我哋而家落去錄埋音佢啦。」
就係咁，錄音嘅過程順利咗好多，去到第三次佢終於唔使NG一take錄晒然後喺度返聽緊。
我：「六點幾喇，怕唔怕阻住妳食飯呀？」
V：「放心喎，佢哋無八點都唔會返嚟。」




我：「要咁夜呀…真係辛苦晒佢哋。」
V：「係咁㗎啦，公司啲嘢其實多到做唔晒㗎，又要睇下啲細嘅做成點，所以一係就直情唔返去，既然返咗公司就多數做到八九點先走，有時要見客或者同同事食飯嘅話，基本上我都唔使諗等埋佢哋先瞓。」
我：「點解佢哋咁忙重有時間管住妳嘅？」
V：「因為係錢嘅錯！係科技嘅錯！」
我：「希望妳遲啲…大個女之後…會好過啲啦。」
V：「我無呢個奢望呀，佢哋只會諗住捉埋我返去開工。」有人為咗搵唔到工而煩惱，而幽蘭就，唉…
如果到我哋畢業之後，我同QQ可以一齊去佢公司返工都唔錯，QQ係我老細，幽蘭係我大老細，我最叻就係服侍老細，包保佢哋嘅靈魂同埋肉體都會舒舒服服，幽蘭可以直接傳召我過去，而QQ作為下屬兼且要保住份工，應該都唔會介意借出自己個下屬畀佢用用，無所謂嘅，佢兩個都咁friend，只要我服侍完大老細再同QQ一齊放工，返到屋企再氹返佢就無死。
諗諗下，咁我咪永遠無得收工？分分鐘左右逢源變進退維谷，而我無謂又多餘嘅性幻想亦都暫告一段落。
我：「使唔使咁認真…其實都係功課嚟啫。」
V：「梗係要啦，至少唔可以低分過佢哋，不過…都收貨啦，見你進步得咁快，再吹毛求疵怕你唔開心呀，我等陣安排管家送你返屋企啦。」




我：「吓，唔使喎…我應該識路行返出去窩打老道或者太子道，咁咪可以搭巴士囉。」
V：「唔得呀，唔准反抗，佢都一早準備好車你返去。」
我：「既然妳講到咁，我唯有乖乖聽話啦。」
V：「五分鐘後可以上車喇，你而家跟我過嚟先。」
明明佢就成個老細款咁，其實返工好適合佢吖…
佢又帶我嚟到廚房，工人喺度準備緊晚餐無理我哋，幽蘭就打開咗雪櫃最底嗰格冰箱。
V：「嗱，揀返個一陣上車食啦。」