為了實現媽媽遺願，我成為了女兒國唐僧: K300

Q：「低B…我唔係為咗你囉，你剩係想我唔著衫嘅啫。」
妳咁講錯唔晒嘅，但妳自己咪又係著咗幾塊布都露晒啲肉出嚟咁，我是但著件T都密實過妳…
Q：「唉，波太大，好似有啲唔係幾襯。」串得妳吖…
我：「我隨時出得門口㗎喇，女人。」
Q：「你咪咁多聲氣呀！我重要睇下去邊區比較安全…鑽石山高危…旺角…尖沙咀都高危，分分鐘撞到Yvonne都唔知，雖然而家就咁俾佢見到都無乜嘢…」佢轆電話睇。
即係咁，人哋都知道妳係玩仔高手嚟俾佢見到我喺妳身邊好閒，就算打埋茄輪都好過妳俾人見到買特價三餸飯…
Q：「好啦！就去沙田啦，安全得嚟又唔太遠。」
我：「其實妳係咪想講成個九龍都危險，過海又太貴？」
Q：「你知就好啦，要過咗隧道先可以拖我手㗎！」妳真係得意，其實我又唔係話一定要拖嘅，見到妳著得咁精緻我都唔係幾好意思拖妳，hea到咁又邊襯得起妳。
望住妳一身成熟入流嘅打扮，千金雕砌出嚟嘅頭髮，重有妳頸上面嘅巨蟹座鏈墜…我睇得越嚟越入迷。




我：「其實…九月份生日係乜嘢星座㗎？」
Q：「廿二打前係處女，廿三打後係天秤，Zilvia係處女座，嗱，唔準諗衰嘢，我知你諗緊乜㗎。」
我：「點解咁麻煩，唔直接用月份嚟分乜嘢星座？」
Q：「總有原因嘅，想知就去研究歷法同天文學啦。」
我：「妳哋而家有五個人，咪年年都要慶祝五次囉？」
Q：「你可以咁講嘅，其實都幾嘥時間，但人生就係咁。」
我：「咁下個又到邊個生日呀？」
Q：「下個就係Uranus，跟住就係到你。」
我：「多謝妳記得我嘅生日，不過唔使同我慶祝㗎喇。」
Q：「梗係唔同你慶祝，喺我心中已經幫你慶祝咗三十幾次。」呢個女人…一直脅持住媽咪同我嘅秘密。




我：「咁Uranus係大過妳哋定細過妳哋㗎？」我當然唔會講佢知YY大一年嘅事，以免人頭不保。
Q：「佢係最細嘅，所以成日都話自己最青春。」
我：「吓…睇個樣又唔覺得佢似係最細嗰個。」
Q：「你都搞笑嘅，差幾個月邊有得睇㗎，你咁講不如話睇唔出周B咁細粒但讀書可以打低晒全級人。」
我：「咁…妳同幽蘭真係諗住去幫瘟神手？」
Q：「我未講實㗎，佢就話睇我頭總之跟實我，本身我就無乜所謂，只係諗住高中點都要搵啲嘢做下啫。」
我：「但係…瘟神對妳有感情上…會唔會唔係幾好？」
Q：「又唔會嘅，重點係佢都算正經做嘢，而佢鍾意我都無乜點啫，大把人都話鍾意我啦，包括你個好朋友，我相信瘟神公私分明唔會對我做過份嘅嘢嘅，況且我都唔係逆來順受嗰啲女仔，邊個男仔傷害我我唔會俾佢好過。」