為了實現媽媽遺願，我成為了女兒國唐僧: K299

Y：「信你呀，肯定諗埋女神啲衰嘢。」
我：「唔呃妳，咪就係諗起妳呢隻多毛蟹。」
Y：「不知所謂！」呢句佢係開聲講出嚟。
我擺出一副不置可否事不關己咁嘅樣，阿健同思韻個樣有啲迷惑，我諗喺佢哋眼中係完全搞唔清我呢隻兵同主人嘅好朋友到底係乜關係，無問題吖，因為我自己都唔知…
結果三堂Lab堂就係同我哋介紹啲apparatus，提醒我哋唔好打爛嘢否則好大機會要賠錢，同埋再不厭其煩咁要我哋練習點著賓身burner就完結咗…
星期一無乜嘢攪，阿健話今日有嘢做就走人，我表示理解就自己返屋企，等咗陣QQ亦都出奇咁好快返到嚟。
Q：「少有喎，咁快就返到嚟嘅。」
我：「點會呢，我不朽都咁早，妳話緊妳自己咋？」
Q：「好難講，點知你會唔會私會其他女神。」
我：「無呢個可能性，我心中只有唯一一個女神。」




Q：「又講大話，一早心淡，呢個世界有右就有左，今次有人同左女神坐，同左女神食飯，隨時同左女神做埋…」
我：「咪傻啦，人哋乖乖女嚟邊似得妳咁樣。」
Q：「話你對佢做埋啲唔三唔四嘅嘢咋嘛，我警告你呀，千祈唔好對佢打任何主意，我希望佢轉校之後會有一個非常良好嘅體驗，可以唔記得晒以前啲衰嘢。」
妳真係瞭解佢？佢似係想喺妳背後打緊我主意多啲喎。
我：「我邊敢…但你使唔使咁驚，人哋又唔係Zilvia。」
Q：「鬼叫你紀錄良好，你去溝八婆Yvonne理得你同佢玩到翻天覆地，又或者你想挑戰Uranus我都唔會插手。」
我：「我…好珍惜生命㗎，唔通你就咁想我撒手塵寰？」
Q：「如果你敢攪我啲女我真係同你死過…我見今日無乜功課，點呀，有無興趣同我行街？」呢個女神真係跳脫，明明上一秒喊打喊殺，呢一秒就可以約我去拍拖。
我：「妳約我我實去㗎喎，妳都知我好乖㗎啦，係咪想出去食嘢？定係妳有其他目的？」
Q：「Zilvia就生日喇，想去打點定佢份生日禮物。」




我：「哦呀，重以為妳哋會幾個一齊去準備。」
Q：「開咗學就無咁易約㗎喇，同埋我想早啲準備定，因為我哋其實已經一早謦好，最驚買唔到件嘢。」
我：「有錢點會買唔到呀，又話香港係購物天堂。」
Q：「好難講㗎，所以我先想早啲去問下，咁我準備一下出門口先。」可能你哋會奇怪點解佢先啱啱返屋企又要準備出門口，無他…佢又喺度畫眼仔同嘴唇。
我：「雖然妳約我拍拖好開心，但其實唔使搞咁多都得…」佢重一路襯緊衫，出面黑色馬甲背心，入面貼身低胸白色打底，著住條粉紅色底褲揀緊裙。