thriXt Qantasy 純文字安眠之作 (New: - U2K - 一直上架): K280

V：「嗯，你跟我嚟吖…」然後佢捉住我隻手帶我行返落去下一層嘅後樓梯，好彩啱啱無人啫，如果唔係俾人睇到就實聽俾人大做新聞，女校出身嘅佢對呢啲嘢好似特別唔敏感，定係佢一開始就無打算過當我係男仔？
V：「睇下，我管家泊咗車喺嗰個錶位喇，等我text佢叫佢兜過嚟校門接我先。」窮人如我真係追唔上佢哋嘅思維，個錶位其實都只係喺學校後面馬路對面轉角，俾我嘅話只會諗住行過去上車，而唔會諗到叫佢兜嚟校門。
我：「咁好啦…下個禮拜一再見。」
V：「嗯，你唔陪我一齊落去呀？噢，我知喇，你梗係驚俾Queenie撞到然後佢會呷我醋，係咪？」
我：「係就好，如果佢識咁諗我就唔使每日忍得咁辛苦啦，之不過呢個鐘數有啲晏，俾人見到我哋又一齊唔係幾好嘅，好似全日都黐埋咁。」
V：「哦，多謝你咁為我著想，咁我行先喇，bye！」
然後我就睇住佢急步咁行落後樓梯，明明佢平時就咁神采飛揚充滿活力，又有邊個睇得出佢唔開心噃…但講返轉頭，我都唔係好知自己啱啱做咗啲乜，可唔可以我話自己有精神病叫QQ幫我發洩下？如果我唔想死嘅話…又可能佢會叫細蚊嚟同我急救醫病。
我諗…以後唔會有咁多時間同佢黐咁埋喇掛？星期一都調位，希望可以同返個正常人坐就夠。
落到一樓我專登去音樂室望望，發現已經人去樓空，其實呢啲咁專職嘅學會又使乜搵人呀，邊個有玩樂器又有心表演嘅一入學就知啦係咪？唔通怐喺度叫啲乜都唔識嘅人嚟學咩；然而落到球場我發現咗某人重喺度。
我：「喂，乜你唔係嚟試腳㗎咩，做乜打緊籃球嘅？」




健：「一早試完啦，學校無個似樣嘅足球場，咪全世界喺度打籃球囉，你滲唔滲隊呀？」
我：「唔啦，得我一個著校服，咁你點呀，入到隊未？」
健：「OK呀，佢哋都見識過我上次踢社際嗰陣嘅表現，所以只係叫我踢兩嘢做樣畀啲低form睇下咁，你想唔想一齊呀，佢哋問做乜你唔一齊報名喎，講聲就得喇。」
我：「No喇，我係時候返屋企準備晚餐，夜啲重要開工。」我認我懶，如果踢校隊有最低工資我實踢。
健：「咁我返去繼續打波先，bye！」自從呢條友話放棄無謂嘅兒女私情醉心運動之後，好似真係有活力咗好多…
講到晚餐，當然又係我蒲超市嘅時候。
我：「喂，超市啲即食牛腩買一送一，妳啱唔啱㗎？」
Q：「邊度產地先？」佢係明顯嘅不問內容只問出處，妳同佢講個薯仔係阿爾卑斯山嚟佢會即刻話好。
我：「三十蚊一大pack，妳都知係羅湖河以北啦。」
Q：「都可以試下嘅，不過我今晚唔想食公仔麪喇。」




因為工作關係，我屋企只係得星六至二先有飯供應。
我：「咁…米粉？上海麪？蝦子麪？烏冬？」
Q：「我想食拉王呀，得唔得呀，要日版醬油味。」
我：「妳叫到唔會唔得嘅…咁我買埋生菜煮牛腩，加多兩隻溫泉蛋咁樣好唔好呀？」妳敢話唔好就唔養妳。