thriXt Qantasy 純文字安眠之作 (New: - U2K - 一直上架): K267

V：「邊有得咁計㗎，咪睇你手上啲牌係矛定係盾囉，同埋都要睇對家點嗌，如果佢亂吹嘅話就梗係守啦，你唔覺得同大話骰差唔多咋咩？」
我：「差十萬八千里喎…一陣不如畀妳叫晒好唔好？」
V：「梗係唔得啦！你唔叫牌我點知你手上有啲乜喎，咁啦，我寫個計分scheme畀你，一陣你跟住嗌就唔使亂咁嚟，同埋都要睇我反應㗎。」
計分…我都知有類似嘅嘢，鬼唔知渣住一花JQKA就等於已經成事咩，但世事往往係8TJQ咁，你以為可以一打結果隻隻都輸少少嗰下先心悒。
鬼唔知QQ鍾意我，但鍾意唔等於會同我拍拖。
喺幽蘭寫緊攻略嘅時候，我又用啤牌喺度砌鐵塔，膠牌本身好跣唔太適合攞嚟砌，但lab入面有防火mat好啱囉嚟做底座而且呢隻牌背面係有壓花紋無咁滑。
V：「你都幾好心機㗎喎…」
我：「無計啦，呢度唔俾玩鋤大D廿一點show hand…」
「喂！死仔包你又喺度砌啤牌，阿Sir就嚟喇！」
我：「橋牌學會嘛，我咪嚟起下金門大橋囉，睇下，上面放個粉刷喺度都未冧…oop…冧咗…實死好多人。」




冧嘅原因就係主席喺個底度抽走咗一隻牌咁大把，可見短樁工程實在係非常危險，禍害人間，請用手扭緊鋼筋帽。
的而且確，橋牌學會係有好多金牌會員，平時上嚟見未有名簽就會出去遊下先，出出入入咁其實無幾多個係專心喺度打bridge；但可能因為多咗個仙女喺度嘅關係，入到嚟嘅人都專心坐定定，有個同我一樣長期失踪嘅中三女仔坐喺附近，有枱未生銹嘅中二竟然主動打起contract吸引咗幽蘭去睇，班小朋友就讕醒咁特別多嘢講。
我心諗，位女神姐姐睇緊你哋有幾廢咋。
「嘩！爽師兄，點解你身邊啲女伴一個正過一個嘅？」
如果各位要喺學校入面溝女，請小心你身邊所有識你嘅小師弟，通常係會口沒遮攔幫你加鹽加醋例如呢個form2仔，嚟呢度一樣係為捱時間同我以前差唔多。
我：「東星哥咪亂講啦，同班同學呢啲邊輪到我揀嘅啫。」其實佢幾得意嘅，係條大海斑嚟。
「師姐要帶眼識人呀，佢身邊成日有個Q字頭嘅女仔。」
V：「你講Queenie？佢係我嘅好朋友嚟…」
「吓？！原來係姐妹…當真係爽師兄藝高人膽大，小弟有眼不識泰山，實在欽敬欽敬，佩服佩服，爽歪爽歪。」
我：「…」係咪做咗高form就會有呢啲待遇…




過咗陣位帶組阿sir嚟咗，佢教高form數學同M2，亦有幫手教form1仔，帶咗五六個新同學入嚟，當然亦都有三幾隻自來蜢，再加本身十幾廿個長期會員，年年都係咁。