thriXt Qantasy 純文字安眠之作 (New: - U2K - 一直上架): K266

V：「科長，我哋而家係咪可以去打橋牌喇？」
我：「係呀，不過我哋唔使郁，橋牌聚會就係喺Phy Lab。」禮堂門口其實有塊牌會寫低所有組別嘅招生位置，而我哋當然就唔使辛苦自己喺入面擺booth，因為長期有大量金牌會員支持，全年只收十蚊會費亦係一大噱頭，邊似得攝影學會呢啲夾instax都無咗兩餐飯。
V：「但我啲嘢無攞上嚟重喺樓下課室。」
Q：「落去攞返先啦，我哋都要落去音樂室。」
Y：「嗯，搵埋Zilvia一齊行啦，唔知今年會唔會有多啲得意嘅低form男仔呢？」
Q：「唔通，妳發現咗自己係正太控，要準備轉會？」
Y：「無囉，只係呢度陰盛陽衰有啲悶吖嘛，今年就靠妳色誘啲有潛質嘅男仔返嚟啦。」
Z：「如果我係form1仔，我驚會俾妳兩個嚇親。」
Q：「想要仔妳咪去band soc勾引啲返嚟囉。」
Y：「咪攪，剩係班上面嗰兩個已經令人唔開胃。」




我點解要跟住佢哋行？我都唔知，慣性嚟…反正通街都當我係狗。阿健亦都同返思韻一齊落去，睇得出佢開心返好多，爽朗嘅笑容出返晒嚟，而阿健當然一頭霧水。
健：「你真係唔嚟？一陣落嚟跑兩嘢，射兩下波，控下傳下應該就OK，以你嘅體格嘅話。」
我：「唔喇，邊有時間。」我望一望執緊嘢嘅幽蘭。
健：「明嘅，咁平時先自己約出嚟練啦。」
放心，就算我唔打校隊唔代表我會放軟手腳嘅，因為我知道迫於無奈之下今年嘅混賬社際足球又會對住你，無論你有幾大進步都好，我係唔會俾你得戚嘅。
離開課室之後，我同幽蘭又上返去Phy Lab；雖然佢已經換返一套正常校服，但去到邊都會惹嚟豔羨嘅目光，隨之而嚟就係對我嘅批鬥…我明嘅，確實以我嘅水平有個咁嘅仙女跟住我實屬太不該。
「嘩！爽…爺，你今日竟然準時嚟，呀，妳好呀…」
我：「鬼叫我啱啱喺度落堂咩，佢係插班生Vienna。」
V：「你好，我係跟埋嚟玩下㗎。」
「歡迎呀…跟埋嚟，咁應該要入會啦。」




我：「一陣先算啦，唔該整副牌嚟先，主席佢哋呢？」
「佢哋中五…今日應該有好多應酬，一陣會嚟㗎喇。」
我：「唔要紙呢隻，我要黑色膠牌唔該。」
作為金牌會員當然知呢度大概嘅運作，上年中五位主席會榮休，由上年中四位副主席頂上，啱啱最早嚟呢個係同我同form嘅興仔，上年已經開始做總務，負責管理住幾副啤牌咁大把，諗下都知道係比科長更廢嘅職務。
除咗要準時嚟報到之外…所以小弟實在不能勝任。
V：「你重睇規則嚟做乜，又唔係未玩過…」
我：「係呢，妳平時鍾意做攻方定做守方㗎？」