為了實現媽媽遺願，我成為了女兒國唐僧: K264

我哋組比較穩定，三個人本身就有一個女仔，最簡單就係是但吸納一個被褪出嚟嘅男仔就得，所以我哋郁都唔郁等某君坐落嚟就算；而女神佢哋就比較慘，注定要打散做二二一嘅格式，而你哋亦唔需要擔心女仔之間嘅交互作用，喺開學初期，女神姣閪書呆呢三種物質嘅排斥力係會比起男女相斥更加強，係超越晒同電極同磁極嘅強大斥力，就連逆滲透都唔可以將佢哋黐埋一齊…
據我明觀暗察，Zilvia係同QQ friend啲嘅，但由於天王星佢比較強勢，經常趕走晒啲仔，所以就吸引咗Zilvia黐埋去，亦有可能係費事阻住QQ搵食。
眼前嘅問題係，QQ到底同學校姐妹一齊好定係同老朋友一齊好，呢個魚與熊掌手背都係肉嘅問題…
好快，UZ就即刻走咗去搵豬龜，始終U一直就鍾意差遣豬而Z又同隻龜叫一場相識，然後殘酷咁迫走咗一個無咁friend嘅豬朋友…不過等咗陣都無仔過嚟。
唔通我真係咁乞人憎？定係思韻真係咁唔吸引？
正當QQ頭痛到爆嘅時候，YY向佢打咗個眼色再走埋嚟。
呢個舉動令到QQ呆咗，思韻直頭係望住張枱唔知點好。
Y：「喂，你係咪真係咁想同女仔坐呀？」
健：「吓…Yvonne，請問即係點？」
Y：「我過嚟呀，你係咪要分開我哋兩個女仔呀？」




健：「啊，sorry。」然後佢即刻起身由我右轉去左。
講就係威係勢，到人哋嚟到你面前咪又成隻死狗咁。
而呢個時候QQ就帶埋幽蘭投靠周B嗰枱男子讀書組，對於天降女神佢哋當然無人想走，結果好死唔死迫走咗個最有價值嘅學霸退位讓賢，跟手Myth就向佢招手佢亦都是但過咗去，然後就係三姣閪猜包剪揼，點知個姣閪之首玩猜完來係廢J嚟，第一下就輸咗俾兩個好姐妹，被迫走去搵枱木獨男…嘩，金剋木呀該煨。
對於外面嘅世界點變乜都好，我對YY走咗過嚟係心存感激，畢竟我都睇得出思韻喺呢班嘅寂寞。
Y：「喏，我同條EX散咗喇。」佢用一個阿健聽唔到嘅聲線嚟講嘢，女仔喺呢方面永遠係專業。
J：「都…咁耐以前嘅事…」
Y：「唔係好耐啫，我好記仇㗎，小學笑過我嘅男仔我全部記得晒。」我都信…妳哋真係好恐怖。
J：「咁妳又過嚟…係乜嘢意思喎…」
Y：「妳而家唔係有仔咩？有無相睇下啊。」
J：「唔係幾好意思嘅，咪又係廢J一個嚟。」




Y：「呢個年紀嘅男仔有邊個唔係廢J嚟喎，整嚟睇下吖，有得笑下都好。」
J：「有乜好笑，妳笑我咪算囉…」
Y：「如果佢係廢J，我笑完咪當打和囉，又或者佢真係咁好仔嘅話咪當我輸囉，好唔好？」