為了實現媽媽遺願，我成為了女兒國唐僧: K263

Q：「妳咪去玩下囉，不過驚妳覺得有啲落差啫。」
V：「唔緊要嘅，玩下啫，又唔係打比賽。」
今勻真係仆直，橋牌要兩個人合作，我上一次玩已經係上年嘅事嚟，如果我連叫牌都叫錯就真係影衰晒左女神，於是乎我即刻上wiki搵個contract規則嚟睇。
V：「唔使咁緊張喎，隨便玩下就得㗎喇。」
妳哋口中嘅隨便，喺我眼中已經係神級，剩係見到QY兩隻望住我就知係等睇我出醜，雖然佢哋唔會嚟睇。
中午後，我哋有三連Phy Lab堂，大家又根據返各自嘅物理定律嚟坐，而好明顯物以類聚人以性分呢條law去到邊都apply得到；女神五位，姣西三位加男班長同易仔，讀書女三位加另一位單丁女，思韻無奈之下同返阿健坐而我就走埋過去得三位，十三條女就喺晒度嘞。
呢啲不穩定時間雖然唔會爆炸，但大家都唔自在。
詩敏老師入到嚟，又係例牌嘅起身問好行禮，呢個Miss真係好靚，我諗佢讀書嗰陣絕對唔會差過任何一個女神，唔知佢有無收兵呢？或者佢可以建立一個練兵學會…
X：「喂，大家，substance transport機制有邊幾種呀？」佢唔似乖乖女，第一堂開始就咁激。
「但Miss…呢一堂係Phy堂唔係Bio堂喎。」




X：「咁又點，Physics讀嘅係宇宙入面所有可客觀描述嘅概念，物質點移動唔使識呀？邊個答到我加零點一分平時分。」
「係diffusion，osmosis，active transport。」榜眼女應聲彈出，分不可失。
X：「你哋而家嘅坐位排列係用緊乜機制呢？」
慕：「照道理就係active transport，因為好有規律。」
X：「你哋覺得咁樣好咩？成組都係女仔會唔會有啲唔方便？如果有人認為而家嘅排列係最好嘅話，請你哋舉手，我會由得你哋咁坐…好，無人舉手啦嘛。」
比起班主任，呢位半職Miss真係識玩好多。
X：「嗱，你哋班有三十四人，我想分返八組，即係有六組四個人，兩組五個人，而你哋係有十三位女同學，即係每組會分到一到兩個女同學，如果得一個女仔都唔使覺得慘嘅，相信妳嘅男組員會好好照顧妳，我亦都好鼓勵組與組之間嘅交流，同埋如果有投訴嘅話可以即時同我講，基本上Miss我係一定會幫返女仔，如果無問題就畀十分鐘你哋osmosis溝通下，都知你哋唔會diffuse到。」
呢啲時候…就似係玩大風吹同收賣佬嘅破冰遊戲，只不過而家係上緊堂，等咗十零廿秒望來望去終於有人起身調位，而Miss就坐喺出面蹺埋對腳喺度睇書。