為了實現媽媽遺願，我成為了女兒國唐僧: K251

V：「吓！點解嘅？女校成日一班去㗎喎，咁會點㗎？」
我：「無乜點，會俾人傳有路囉，但我哋應該唔會嘅…」
V：「乜係咁㗎？Sorry呀，頭先飲得太多嘢…我對上一次讀男女校已經係幼稚園…不過我無所謂，無拖拍又唔諗住拍拖，啊，定係你驚Queenie佢呷醋呀？」
我：「呷乜鬼，佢自己有男朋友點會理我。」
V：「咁又係。」呢三粒字真叫人聞者傷心，聽者流淚。
我洗完面當然快過佢，諗到啲同學諗乜就覺得麻煩，雖然我都喺度諗緊幽蘭拉高條旗袍除底褲屙殊殊個樣…認真，男同女唔應該一齊去洗手間，話雖我聽QQ殊殊已經習慣成自然，連啲底褲漬同味都開始認得。唔等佢驚佢唔開心，等埋就驚啲同學好開心，算啦，都係等。
慘在廁所喺前樓梯，我哋班房最近後樓梯，即係全form人都睇到晒我哋兩個一齊去廁所，而且佢重要鶴立雞群咁好認，拜託啲人仔唔好太口臭。
英文連堂實在係好難頂，喺我頭上面放條瀑布就差唔多…
返到課室繼續上堂，兩隻眼好似俾人打咗麻醉針咁。
V：「係咪啲藥累事呀？有時食完…會好攰㗎，不過無理由咁快見效㗎，先一個鐘到。」




我：「我諗唔關事嘅，我每次上英文連堂就係咁，唔使食藥都可以無晒七情六慾五感四維三達德，而且重要啱啱食完飯，食得太多飯…我個腦消化唔嚟。」
Q：「妳唔使咁關心佢㗎，呢條友無得救，嗱，醒你嘅。」QQ講完就係筆袋攞咗三個書夾放喺幽蘭枱面。
即係金屬製上咗黑色漆，有兩隻銀色耳仔嗰種…
V：「嗯，妳畀啲咁嘅嘢我嚟做乜？」
Q：「小小肉呀，自己意會啦。」
聰明嘅佢當然知道自己好朋友嘅意思，所以我嘅手背，手臂就成為咗佢嘅玩具；一般嚟講我真係好厚面皮唔怕痛，夾咗都只會有小小提神作用，但每次一夾唔實彈開！屌！
先生當然唔係盲，佢睇到我左手手背皮夾住三隻夾都可以繼續教書，睇嚟佢都知我無得救。
又當然玩下夾仔唔會阻礙到幽蘭嘅讀書樣。
Q：「好，放學！攞返啲夾嚟呀，嘥晒我啲消毒酒精。」
Y：「不如成世夾住算啦，揩晒啲皮油可能有毒㗎…」




鬆開後隻手一條條紅色，但我仍然係好鬼死眼瞓。
Q：「咁我而家陪妳落去辦埋啲入學手續，之後就認真帶妳兜學校一圈啦。」
U：「散場定點，使唔使等埋妳？」
Q：「唔使等啦，妳都應該重有嘢忙，聽晚再約啦！呀，妳朵花喺邊呀，可以交埋畀佢保管㗎。」
V：「喺我櫃桶囉，要交畀佢？點解嘅？」
Q：「佢locker有盆盆栽㗎，下次見到妳就明，我哋行先啦，校務處班友最憎OT㗎。」就係咁，我收咗朵花佢兩個就走咗。
Y：「哎唷，終於孤伶伶一個，你今日都得戚得耐咯。」