為了實現媽媽遺願，我成為了女兒國唐僧: K199

豬：「咁Miss妳今年開始剩係教高中中文？」
鄧：「好彩唔係咋！淨係你哋班，其他都係低form。」
U：「Miss…妳唔覺得又教初中又教高中妳會更加辛苦咩？要記多好多嘢喎…」
鄧：「妳咁講又好似係…不過唔使咁驚嘅，我距離考DSE都唔係好耐時間啫，重記得好多嘅，哈哈…」
豬：「聽到妳咁講重驚…不如一齊考等妳攞多粒星。」
鄧：「哈哈，我都幾有信心，剩係考一科嘅話…」
U：「不如考埋數學吖，我可以唔收錢幫妳補習。」
鄧：「嗱，唔好再玩Miss喇下，而家要認真開學。」
開學有乜認真嘢做？派手冊填同貼相再交返畀學校揼印，派無謂回條同簿，重有更新學生資料落學校資料庫；呢個年代已經唔會再填實體form交畀校務處文員打，一切係上網進行，本來係各班輪流借三間電腦室嚟打嘅，不過懶惰又開明嘅Miss Tang就叫我哋自己攞部電話出嚟登入內聯網搞掂。
呢啲嘢咋一聲就搞掂，我又喺度重操故業。




鄧：「阿爽！你係咪兀少一陣凳就會死㗎？」
當然，班房又會隨之不乏發出歡笑聲。
我：「Miss，我確認咗今次唔會影響到其他人先兀㗎，我後面係埲牆嚟，妳都睇到我而家嘅苦況㗎啦，實在係三面楚歌，唯有借兀凳嚟抒發一下孤單寂寞嘅心情。」
相信兀過凳嘅你哋都好清楚，挨住後面牆不知幾梳乾。
鄧：「而家唔係教緊書，我懶得同你詏，亦無眼睇你。」
我：「係呢，係咪今日就會調位㗎喇？」
鄧：「關於調位…唔調住，你哋坐住先啦，坐到而家咁應該有你哋嘅原因，調位就聽日先再算啦。」
我：「吓，乜調位唔係開學日嘅必然動作嚟嘅咩？上年都係第一日Miss妳叫我哋點坐…」
鄧：「重好講！我啱啱先知今年要教你哋咋，等我抖下先，同埋有原因嘅…總之聽日先再算，再嘈要你做足三年最後排排長！」
「哈哈哈哈！哈！」「乜有排長㗎？」「咁有無連長？」




如果大家仍然記得，Miss Tang佢係一個好得意嘅Miss，全靠大家對佢嘅體諒同埋唔忍心，呢個課室先可以暢順運作落去，而且充滿歡笑聲；不過呢個時候Miss望一望走廊，示意我哋檢點啲，正當我哋以為校長或者訓導巡樓嘅時候，Miss佢行去門口帶咗一個女人入嚟！