為了實現媽媽遺願，我成為了女兒國唐僧: K198

班房越嚟越嘈，直至到有個垂頭喪氣嘅Miss入咗嚟。
鄧：「各位同學…早晨…」
開學未有班長，當然就唔會有人嗌起立早晨呢啲。
Q：「Miss Tang早晨…妳…無行錯班房吖嘛？」QQ起立問Miss，始終做咗我哋一年班主任最熟嗰個可以算係QQ。
鄧：「唉，我都想係行錯呀…可惜唔係，你哋做乜咁樣望住我？」佢雙手撐老師枱好似重痛苦過我哋咁。
Q：「Miss妳唔係剩係教初中㗎咋咩？」
鄧：「本來…今朝重係，但十分鐘前啱啱唔係。」
U：「咁鄧老師係會教我哋中文？」
鄧：「唔教中文重有乜可以教？你哋班連中史都無…」
Q：「Miss妳…應該係無教過DSE中文㗎可？」




鄧：「梗係無啦，如果我無記錯都係早你哋半年嚟呢間學校，你哋點會唔知。」
Y：「Miss，唔介意問下妳以前DSE中文攞乜成績吖嘛？」嘩，女魔頭呢個名當之無愧，尖銳得佢吖…
鄧：「喂…你哋成班咁樣望住我係乜意思？唔好咁啦…睇嚟唔答你哋我都好難有學放，其實呢…我當年都有一粒星嘅…」Miss Tang又真係好傻豬咁答佢。
U：「咁…我哋重有無機會攞五星星㗎…」
鄧：「哎吔，唔好咁啦，你哋個個都咁叻仔叻女，考得好過Miss係好平常㗎咋！如果真係無信心嘅話…就自己去補習啦…冷靜啲，而家要開學係點都唔會變嘅事實嚟。」呢個Miss實在夠晒現實。
Q：「我哋好冷靜…Miss妳都可以鎮定啲。」
鄧：「係…係，咁你哋坐返低先呀下，咁多位同學，大部份都見過嘅，重有啲係第一次見…如無意外，嚟緊嘅三年我都會係你哋嘅班主任嚟㗎喇…」講到呢度，Miss下意識咁望一望過嚟我同QQ呢邊，應該係頭痛緊繼續做我哋兩個班主任就彷彿抱住咗個計時炸彈咁。
鄧：「姑且同大家解釋一下啦，事緣有一個本身教開高中嘅中文Miss喺啱啱嘅暑假移民，本身呢個空缺學校係搵咗個合約老師嚟替代嘅，但到今日入職簽約嘅時候，呢位老師強烈堅持唔會做高中班級嘅班主任，否則就唔簽約，一輪周旋之後校長佢決定讓步，然後就搵咗我話我嘅表現一直良好，叫我試下教高中中文…」
豬：「鄧老師，妳有無覺得自己俾人氹咗入局？」
鄧：「喂呀…我返工無得揀㗎，你哋唔好唔開心啦，諗下喎，如果係合約教師教你哋，隨時一兩年就走人，而家起碼有我對足你哋三年吖，就等我哋一齊努力啦！」