thriXt Qantasy 純文字安眠之作 (New: - U2K - 一直上架): K192

欣，貞：「誰在悼念，快將接近成年；誰告誡我，課室不要睡眠，在臨別就似明星給我簽名，對我表演，還未學習怎麼紀念從前，便發覺要懂得擁抱明天…」
點解女仔咁鍾意唱K？係咪個個都渴望自己可以好似個偶像咁俾男仔崇拜？好想聽QQ彈一次呢啲歌，或者加埋YY嘅violin都唔錯。
A：「非常多謝Twins嘅獻唱！今鋪真係要開學喇，重有唔夠十個鐘就要返學，識嘅就一齊唱啦！…大概只得戀愛是沒標準的教科書，必須靠人不斷試，學傳情達意，二人共處，才夠真摯，同學各位，找個位，這是你的開學禮…」
慢慢地我已經沉醉喺開學嘅氣氛之中，將會長同其他人嘅歌聲靜音；由聽日開始就要同四大女神做同班同學，只要我唔冧班…佢哋又唔會轉校移民嘅話，就會一直落去至到去中學畢業，唔知會發生乜事呢，我同QQ係咪會維持現狀到畢業，至少感情上…而YY係咪又會繼續虐待我…
A：「最後，就等我哋送返首歌畀畢咗業已經出嚟做嘢嘅朋友，記住聽日返工唔好遲到，重要準時交稅…這校園，這班房，這走廊，這禮堂，告別時，是我心的家鄉，到未來，那一方，人飄泊，路茫茫，仍然在這裏找到一點點光…」望到啲大哥哥大姐姐唱到眼泛淚光，就已經對地獄般嘅社畜生活略知一二，我諗…佢哋真係會好懷念返學嘅日子，而我聽日又可以繼續同右女神做同學。
佢就點都唔會坐我隔籬㗎喇，希望上天有好生之德，令到班主任編到我哋嘅位唔會隔好遠啦。如果，一個唔好彩我同佢天各一方但同佢嘅好姐妹坐就搞笑。
A：「好多謝大家今日畀面出席！而家都差唔多夠鐘還房，小弟我可以功成身退喇，希望下次嘅活動再次見到大家，而唔係剩係出現喺峽谷之中…」
原來唔經唔覺已經成十二點半，全世界開始執嘢走人，而唔知點解落到樓下我同阿健加欣姐貞姐行同一方向。個天有少少雨，雖然唔係好大，但好快我哋啲頭髮都濕晒，貞姐著住白色高領無袖裇透咗入面件淺藍色Bra出嚟，非常性感…至於欣姐就算啦，唔關我事。
欣：「Yeah！開學喇！傻仔緊唔緊張呀？」欣姐個樣重係好興奮，搭晒傻仔健膊頭，完全唔介意自己對波揩咗落健仔隻手臂度，姐姐妳無理由咁易醉呀？
健：「唔緊張！我要溝晒啲女！」呢條友手上面重揸住枝ice，睇嚟無得救，如果我唔喺度都唔知識唔識返歸。




欣：「你？！溝條毛咩！做大兵你就叻！」
健：「無錯！唔識溝所以唔緊張。」
呢個唔係識唔識嘅問題，你條友有無諗過我哋聽日啲女同學係乜款？重話要溝晒，你跳落個井度溝井水算啦。
我：「喂！我哋地鐵尾班車得返七分鐘鑽石山開…」
健：「好叻咩？炸爛鑽石山佢咪大把鑽石！」呢條友真勻洵，我終於明點解有人話油麻地通地麻油…