thriXt Qantasy 純文字安眠之作 (New: - U2K - 一直上架): K168

然後佢就攬實我隻手瞓著咗，睇嚟今日佢都好攰下；著返普通衫嘅佢雖然無咁暴露但就係人都睇到佢用對波騭住我隻手，過咗陣見佢瞓到隻手鬆開我就改為搭過去佢右邊膊頭扶實。而家我同佢一齊出街嘅機會越嚟越多，我覺得俾人認得而出事係遲早會發生嘅事情，到底係佢慣咗所以放下戒心吖，定係佢諗住無論發生乜事都可以拆得掂呢？
瞓唔夠三分鐘就要起返身，返到屋企一齊變死豬。
場show完咗，搵到少少錢，我同佢呢幾日都好享受一齊喺屋企耍廢嘅時光，例如今日下晝我哋就攤床玩電話。
Q：「喂！睇下，啲mask大特價買一送一呀！」
我：「妳天生麗質難自棄，唔使用都咁靚女啦。」
Q：「梗係唔得啦，你會唔會話身體健康就唔使吸收維他命C吖？你自己都識聽媽咪話日日食生果啦！」
我：「係嘅…咁平咗咪買囉，不過呢間嘢要隔籬再隔籬再隔籬條邨先有。」重遠過Carmen屋企，又唔近MTR。
原價一百蚊五塊，半價十蚊塊，對佢嚟講算係好合理。
Q：「你係咪諗住繼續攤喺度？」
我：「又唔係近，有機會經過咪順便買囉。」




Q：「幾可會經過呀，得四日咋，遲下就無晒啲款。」
我：「呢啲嘢…款款都差唔多㗎啦。」喺我眼中啲mask其實同洗潔精差唔多，唔同味都係落唔同香精啫。
Q：「梗係唔同啦！唔同膚質要用唔同type㗎，有控油，保濕，美白，排毒，去班…總之全部唔同！」啱呀！渣古，老虎，大魔，格魯古古，強人全部都唔同添。
我：「妳咪去買囉，如果順便…可以托枝zero返嚟就好。」受佢影響我都越嚟越慣咗飲…
琴日先去咗買餸同埋同阿健踢波，今晚又要返工，而家我當然唔想郁，但我絕對歡迎佢自己行去買，反正嗰一二百蚊對呢個高薪厚職嘅女神嚟講絕對唔係啲乜問題。
Q：「不如一齊出去？我可以請你食晚飯…」
我：「真㗎？豬豬？咁開心呀！」重點係如果出去食晚飯嘅話我就可以唔使煮，雖然我唔知啲錢應該點計先啱？
佢出埋啲咁嘅超必，我又點可以唔屈服喺佢嘅淫威之下，當然即刻換衫啦；有時我會覺得我已經成為咗佢嘅認証朋友，即係佢係會約我出街一齊去玩嗰隻，就算俾人撞到咪死頂話只係朋友，只要我哋唔係喺條街度打緊茄輪就得，所以呢啲繁忙時間我哋係唔會拖手嘅。
點知就到目的地嘅時候，我見到迎面而嚟嘅一個女仔，係姐姐嚟嘅，雖然只係一身飄逸嘅街坊look，但就遮蓋唔住佢唚唚青春活潑嘅氣息，而且重幾靚女。呢種靚唔係女神愛嚟崇拜嗰隻，而係觸手可及嘅。