為了實現媽媽遺願，我成為了女兒國唐僧: K167

我：「咪就係，咁我羨慕妳都好正常呀？」
Q：「你唔好唔記得啲嘢你有份㗎喎，我咁勤力搵外快，都係唔想使你太多錢，我大可以乜都唔做食窮你㗎！」
我：「妳可以㗎…我又唔係介意做一個窮光蛋。」
Q：「唔得呀，你要儲返少少錢呀，萬一第時有事點算？」
我：「咁我有嘅，同埋其實都重有爹地可以救我。」
Q：「你係咪好驚我搵得越嚟越多，終有一日搬走？」
我：「唔到我驚唔驚，Queenie妳咁叻女遲早實可以照顧自己㗎，差在快定慢啫，一定無可能成世都需要我接濟，其實我見到妳咁成功都好開心…」
Q：「邊有咁易吖，除非我可以確保每月可以搵到萬五以上，如果唔係我死都唔會搬走自己住。」
我：「聽聞啲紅嘅KOL月入三五萬一啲都唔出奇。」
Q：「人哋係全職拋個身出嚟做，不計後果咁做，我唔會喇，我重要畀心機讀書，靠賣藝搵食好無保障，萬一做錯嘢講錯嘢啲fans走晒就可以即刻宣佈失業。」




我：「係嘅…對妳嚟講，讀書可能更加搵錢。」
Q：「知就好啦，所以你都要畀心機讀書。」
我：「所以咪更加羨慕妳囉，有時我會諗自己其實係咪好蠢，就算點讀都唔會有乜成就，啱啱見到沙織咁嘅樣就好驚第時考完一模一樣，雖然喺酒樓打工都叫搵到食…」
Q：「點會，你唔算蠢。」
我：「點解妳可以咁肯定呢？」
Q：「因為我冰雪聰明囉。」
我：「妳呢個答案令我覺得好矛盾。」
Q：「唔矛盾呀，我講乜就係乜，做人知足咪開心囉，日日喺度計幾多錢有乜意義，同埋唔好唔記得，我係因為有你喺我背後支持我，先可以無憂無慮咁讀書，重有時間直播，如果唔係我邊有精力做咁多嘢喎。」
我：「真係？我成日覺得妳乜都可以自己搞掂。」
Q：「係呀，所以你係好重要，多謝你。」佢講完就哄咗塊面埋嚟惜咗我一啖，明明車廂就重有其他人睇到…




Q：「而家多咗少少零用錢使，我請返你去玩囉。」
我：「咁樣…合理咩，然後我又要畀返錢妳食lunch。」
Q：「合理呀，你負責搵錢養我，我搵錢同你去玩。」
我：「哈…不過我其實無乜特別嘢想去玩，可以日日喺屋企見到妳精精靈靈咁就係我最開心嘅事情，所以啲錢妳儲起佢啦。」
Q：「嗯，所以我都覺得同你一齊住好開心，就算第時搵到錢都未必捨得搬走離開呢個屋企。」