thriXt Qantasy 純文字安眠之作 (New: - U2K - 一直上架): K163

沙：「又真係喎，妳一望就知…」佢望住盒底瞠目結舌。
我：「佢係朱古力專家嚟，晚晚同吉百利瞓覺㗎。」
何：「睇嚟Queenie妳真係出身矜貴，普通嘢係唔會呃得到妳。」女僕長洗完碗出返嚟。
我：「無錯，佢就係㤿憸嘅富家女嚟。」
Q：「重講乜富家女，早就已經唔係。」
我：「富家女呢樣嘢係入血㗎，唔係睇妳有幾錢，而係睇妳有無內涵、修養、品味、格局、視野。」
何：「哈，妳位朋友仔好似俾妳影響得幾深咁喎。」
我：「嗯，我有好好向佢請教中文㗎。」
Q：「唉，佢好嘅唔學壞嘅就學晒，唔好講呢樣嘢喇…啲禮物都要處理咗佢，不如開咗盒朱古力佢大家試下乜味啦，我都未食過土耳其版嘅Godiva。」
我：「普通人未食過貴版嘅Godiva，富家女就未食過平版嘅Godiva。」我一講完枱底就已經有隻腳踢咗埋嚟…




Q：「你試下再講吖，我係一定會收拾你嘅。」
沙：「真係大嘥，呢紮玫瑰都好靚，朵朵都咁紅咁大，連張花紙都係閃爧爧又香噴噴。」
Q：「嗰張珠光紙嚟，平時通常係用嚟印證書同奬狀…係囉，送花真係無乜用，唔係男朋友送嘅就無乜意思。」
我：「可惜唔係情人節，如果唔係睇怕妳會即刻去尖東街頭拆散嚟賣廿蚊枝，咁就可以套現成千蚊。」
何：「如果妳唔想處理都可以放喺我呢度嘅，可以攞嚟佈置下放返幾日，感覺無咁大嘥。」
Q：「無問題吖，妳用得著就實在係太好。」
何：「呢位朋友仔…你都真係好刷得下喎。」
我：「嗯…妳可以叫我做阿爽㗎…可能…因為好似做完嘢咁，咪特別好胃口囉。」其實係唔好意思食剩嘢。
Q：「而家係我返工定你返工呀？！你齋坐咋喎！」
我：「我好歹認得晒佢哋所有人㗎，重有留意佢哋會唔會攞部電話出嚟做古怪嘢。」




何：「呀，係喎，既然你係嚟幫手我唔應該收你錢。」
Q：「點會，收佢兩倍就啱！食鬼死咁多嘢，請唔起你呢啲保鑣呀。」
何：「哈哈，我諗起bodyguard套戲，個女主角又係做登台表演，男主角最後幫佢擋子彈瓜咗，成套戲超級勁爆老套，但細個嗰陣睇都係會感動到喊，諗返起都覺得自己超低能，不過呢，首主題曲真係好好聽。」
Q：「係咪Whitney Houston嘅I will always love you？定係I have nothing？」
何：「吓，咁耐以前嘅嘢…妳竟然識？」
我：「呢個女仔…千祈唔好當佢係一般嘅學生妹。」
呢個時候QQ行咗去部keyboard前面隨手一彈就係音樂。
我應該未聽過，而女僕長個樣就好驚訝。
Q：「大部份奧斯卡提名過嘅電影主題曲都有聽過下嘅，如果無記錯佢嗰年輸咗比阿拉丁嘅A whole new world，以前我屋企兩隻soundtrack都有。」