為了實現媽媽遺願，我成為了女兒國唐僧: K162

何：「唔緊要呀，無人食都係倒㗎咋，我潷畀你吖。」
我終於見到女僕長廚師，佢喺廚房門口伸咗頭出嚟。
沙：「噢，原來女僕長聽到有人入咗嚟…」
何：「咪傻啦，妳唔係以為廚房真係有結界圍住呀。」
我：「多謝女僕長，我可以幫返妳手洗碗㗎，我都係飲食業界嘅一員嚟。」我䚎個頭入去望望。
何：「唔使喇，雖然我真係好少機會一日洗咁多碗碟…係呢，你怕唔怕兜底比較油，好難泌得走。」
我：「唔緊要呀，食得就唔好嘥啦。」
Q：「佢個肚係資源回收桶嚟，倒晒畀佢就得㗎喇。」
何：「咁…肉醬剩得好少，係咪咖哩配茄汁意都OK？」
我：「無問題呀，食物點溝都係食物嚟。」




Q：「係呀，你消化完可以再食多次添呀！」
沙：「我都…食緊嘢㗎…」見識到QQ嘅真性情，沙織姐姐好似跌晒眼鏡感到十分驚訝。
最後，女僕長倒晒啲剩意粉落個大碟，上有半碗肉醬，再加一碗咖喱薯仔蘿蔔，側邊重有堆西炒飯加薯角…唔止，重有一大碗粟米湯，足足有頭先兩份咁多。
何：「啱晒，可以掉少一袋垃圾…」兩個靚女即笑。
我：「妳潷晒畀我…妳哋食飽㗎啦嘛？」
何：「頭先一路煮嗰陣早就已經食飽。」
我將啲食物攞出去放枱面，有啲驚自己食唔晒咁就樣衰…
我：「哈哈…好似食自助餐咁，我唔客氣喇。」兩個靚女望住我滴晒冷汗，我要好好努力唔可以令佢哋失望。
QQ同沙織已經換好衫，變返兩個正常不過嘅青春少女，我哋就好似三個同學仔咁喺學校食lunch，呢種感覺好舒服，好過睇QQ表演，好過俾沙織女僕服侍。
沙：「頭先幫你影相嗰陣見你木口木面咁，重以為你係緊張得滯，心諗你無關重要就由得你，原來…哈。」




Q：「佢係唔稀罕咋，平時要佢幫我影好似要畀返人工佢咁款。」
我：「Nonono，我只係保持返一個專業攝影師嘅樣。」
沙：「睇嚟你哋真係好好朋友，唔通你兩個係…」
Q，我：「就係普通朋友。」我哋一齊開聲答佢。
沙：「噢…哈…明晒，唔使解釋喇。」
呢個時候沙織已經食完佢碟員工福利，一邊抹嘴一邊斟茶畀自己飲，又攪下QQ啲禮物。
沙：「係Godiva朱古力呀，妳啲fans真係捨得，羨慕死人，我咁大個女都未收過咁貴嘅朱古力。」我知Godiva係名牌，但唯一記憶就只有嗰陣時初初識QQ喺又一城飲過嗰杯好味嘅特濃朱古力，唔知佢其他嘢賣幾錢。
Q：「唔使羨慕，妳可以反轉盒底望清楚，呢盒係土耳其版而唔係比利時版，三份一價格都唔使，如果妳鍾意可以隨時買嚟食。」