為了實現媽媽遺願，我成為了女兒國唐僧: K138

健：「我講…事實啫…你日日對住…唔會有啲乜…」
我：「有乜？有大把嘢添，但咪又係咁，你機會難得好昅多啲，快啲追返上去唔好俾佢拋甩。」
健：「有…殊殊嘅水聲…要幫佢洗校服…洗底衫褲…」
我：「其實，當你真正掂過女人之後，呢啲好普通㗎咋，雖然佢係真女神級數，但都會習慣成自然。」
健：「我覺得你吹水多啲…呼呼…聞到女神排出嚟…二氧化碳…汗味…應該可以跑快啲。」
的確，QQ條校裙或者著過嘅底衫褲我都已經習慣成自然，甚至係同佢攬攬惜惜同撫摸…但係，嗰種一齊生活嘅感覺，就始終如一咁新鮮刺激，每日都覺得好幸福。
都黐鬼線，QQ要爆起上嚟實在唔係人咁品，我哋一直跑到去啟德郵輪碼頭，抖咗一陣吹下海風之後又跑返返嚟，睇嚟呢個女仔係不惜犧牲波波半個cup都要令條腰同大髀瘦啲嘅品種嚟。但放棄啦，妳唔會贏到Zilvia。
到咗十一點幾我哋又返到去樓下七仔，明明屋企就喺上面，但我哋都二話不說失去理智咁去雪櫃一人攞一枝嘢飲去埋單；雖然話夜晚無太陽，但始終係夏天嚟，我哋三個全身都濕晒，QQ件top得返個pad位係乾，其他位置都有啲水印喺度，而條褲呢…不過QQ就毫不介意。
阿健就望落死咁滯，就算女神除晒衫都可能扯唔起。
健：「乜Perrier…好飲㗎咩？」我哋坐咗喺對開花槽位。




Q：「係好飲嘅水嚟，同埋有氣，就係咁。」
我：「呢啲係仙女嘅飲品，你唔明㗎喇。」
Perrier，法國進口有汽礦泉水，零卡路里重貴過我哋枝電解質飲品；佢以前應該成日飲，而家佢都有份搵錢，加埋見到佢平時有慳住使，所以我都唔會話佢。
Q：「睇嚟你體能真係有進步喎，唔錯唔錯。」
健：「妳唔好笑我啦，只係啱啱開始咋。」
Q：「咁又係，離溝到女重係有一大段距離，係嘞，我諗住聽日直播打機九至十二，你OK嘛？」
呢個QQ，無時無刻都諗住學業，業務，重有佢啲姐妹同條仔，好似無一刻係會偷懶咁，都唔知點做到…
健：「放緊假，妳叫到嘅話就實OK嘅。」
Q：「幾好，而家咪當練習下，遲啲或者你都可以做真，打機主播搵下零用錢。」
健：「邊有咁易呀，出面嗰啲個個都好勁…同埋我咪又剩係識打機，唔識講嘢，無其他賣點好難吸引人嚟睇。」




Q：「咁代打，陪玩都得啫，聽聞有啲女都會買呢啲。」
健：「哎吔…咁沉迷打機嘅話，會有好女仔咩？」