為了實現媽媽遺願，我成為了女兒國唐僧: K137

我：「呢條女要出show喎，話要保持健美體態。」
健：「吓…乜咁緊要，直播都重唔夠？」
我：「係咪好想去呢，放棄吧，你課得咁少上唔到榜。」
Q：「咪嘈呀！都識我真人，重有乜好去喎！」
健：「咁唔同嘅…起碼Kuromi佢…唔會咁惡鬧人。」
我：「哈哈，話咗佢無得救，重話唔迷女神。」
健：「無迷囉，你就迷，我只係認同Kuromi係個好出色嘅女仔，僅此而已。」
Q：「吓，即係Kuromi就出色，我就唔出色？」
我：「其實你點分佢幾時係Queenie，幾時Kuromi？」
健：「而家呢個咪Queenie，喺網上嗰個係Kuromi。」




Q：「救命…你千祈唔好睇我直播，亦都唔好睇其他妹直播，我唔想睇到你俾其他人鋸到一頸血。」
我：「哈哈，咁妳鋸佢咪得，其實無論Queenie定Kuromi都係一個會飲人血嘅香港女仔嚟㗎咋…吖嘩嘩！」
港女唔止物質主義，而且重好暴力…
Q：「收嗲啦，睇下你條腰，啲皮下脂肪幾厚！」
我：「痛…痛…唔好搣，黐線㗎妳。」
Q：「咁你就唔好講咁多廢話，快啲跑走啲脂肪佢啦。」
暴力女，小心開口中跑到自己對波降cup呀，雖然好似我都係受害者，但諗一諗貧乳QQ可能別有一番風味。
Q：「咁我跑先，你兩個喺後面啦。」
健：「嗯…但點解係妳跑前面嘅？」
Q：「因為…按道理你哋係會跑得快啲，我唔想有一個追住你哋嘅感覺，有壓力會影響心情，其次，你哋會吸晒條路前面啲氧氣，排出大量二氧化碳，加埋啲汗味，會嚴重影響我嘅呼吸同血液循環。」




健：「咁又係喎，我都無諗過添。」
我：「唔好俾佢呃呀，女神係想有兩個隨從阿四跟喺佢係面咋…得得得！唔講，我哋開始跑啦！」
張牙舞爪嘅QQ已經伸出佢嘅揸腰龍爪手落我嘅小厴位置，呢刻我完全無懷疑過佢嘅巨蟹座屬性，甚麼斯文內斂嘅處女，是不存在的！因為已經畀人食咗…
健：「乜按道理…我哋會跑…快啲…完全唔覺…」
我：「佢講啫，我測試過佢慢跑係絕對唔會慢過我，始終女仔喺體重上面有優勢，好彩你呢排有練開咋，如果唔係唔使指擬追到佢，上個禮拜我撞到佢喺條街上面飛奔，快到連我都嚇親…」
健：「佢做乜會喺…條街上面飛奔？」
我：「呢個…算啦，唔講喇，都係啲麻煩嘢。」
健：「Queenie個pat pat…真係好靚…重有…底褲痕…」
我：「講大聲啲啦，我擔心佢聽唔到你嘅讚美。」