為了實現媽媽遺願，我成為了女兒國唐僧: K110*

自己睇IG story發生乜事。

媽：「無謂企喺度講，不如我請你食餐tea啦！」
我：「哦，都好，多謝…」有大人請我食嘢，點都好啦…
結果佢帶住我去到M記，令到呢五公斤zero要走嘅路變得更加遠…重以為啲貴婦會請我食乜好嘢例如特色餐廳，原來係M記，屌！不如一開始叫我揀去返樓下茶餐廳咪算…
無計啦，佢媽咪而家都係肉償換三餐一宿，實在不敢奢求太多，否則背脊骨落於心不忍…
※※※※※
我：「媽咪呀，其實妳唔使嘥錢特別出嚟請我食生日飯㗎喎，我都大個女啦，呢啲好閒。」
媽：「阿女做乜呀…媽咪都係想妳開心咋嘛。」
我：「想我開心就唔會連我幾時生日都唔記得啦。」




媽：「無唔記得，之前忙得滯一時醒唔起，遲咗幾日咋嘛。」呢個女人…到底可以有乜嘢忙？除咗同人扑嘢之外…希望只係得一個男人啦；但，如果佢覺得開心，我都…算啦，拜託妳個女千祈唔好學咗妳。
我：「吓…咁樣都叫遲幾日呀？」
媽：「係呀，妳三十一號生日，今日都只不過係六號…」
先唔講假如遲六日有無問題…個日子…
我：「我三十一號生日？！邊個講㗎？」
媽：「我生妳出嚟點會唔知，我話事嘅，有個三字，最多都係三十號，差唔多啫…」
我：「我俾妳生出嚟就真係唔知，但我張身份證係寫住廿三號㗎！妳係咪虛報入境處呀？」
媽：「哎吔…係廿三咩？算啦，都係遲多一個禮拜啫，妳自己都唔會記得媽咪幾時生日啦，係咪？」
我諗就連妳個阿媽我阿婆都唔會想記得妳幾時生日。
我：「我無興趣知妳幾時生日呀，妳想點就點啦。」




媽：「但係阿女，妳舅父話妳…差唔多無去過佢度瞓喎…」服咗佢，而家先嚟問，重以為唔煩到佢就唔理。
我：「無事喎，咪講過有同學收留我…」
媽：「咁係男同學定女同學呀？」
我：「黐線！點會係男同學！」係妳攪到個女同妳一樣黐線，唔好怪我呀下。
媽：「係邊位同學屋企人咁好心，我識唔識㗎？妳煩咗人哋咁耐媽咪唔好意思呀，想同人哋講聲多謝，係咪…Zilvia呀？」唉，我都想，但我邊好意思打攪佢。
我：「唔係呀，我自己搞得掂…唔關妳事…」
媽：「係咪Vienna呀？我都叫做識佢媽咪，但係佢又唔係妳同學…不過佢屋企就肯定照顧到妳嘅…」
我：「夠喇！唔係呀，唔好打攪我啲同學同朋友呀。」
媽：「媽咪只係擔心妳咋嘛，晚晚唔知去咗邊度瞓…」
我：「我夠唔知妳喺邊度瞓啦，咁我係咪又要擔心返妳…而家係妳照顧唔到我唔係我唔想跟住妳生活，既然我自己搞得掂，當無事啦好無，一係妳畀地方我住。」