為了實現媽媽遺願，我成為了女兒國唐僧: K109

除咗似樣，身形同身材都似，對波就差唔多或者再大多半個cup，唔會話太誇張；除咗靚，重有貴氣，但係貴夾唔飽嗰隻，論內涵我敢擔保QQ贏晒佢媽咪…
我：「似呀…我重以為…Queenie佢有家姐…」
媽：「吖，你個靚仔呀，食蜜糖大㗎？不過我開心喎。」
我：「唔係呀，講真…好少可見同學家長咁後生。」
媽：「呵，因為我好早就生個衰女包出嚟吖嘛，我真係好後生㗎咋，得三十幾，就算而家再生都唔係高齡產婦。」
佢唔止生理上後生，心靈上都係，就似QQ講咁有啲低B…即係咁，我覺得學識方面呢，仔女高過父母就一啲都唔出奇嘅…但態度呢…就真係比較少見啲咁可愛嘅媽咪。
But…應該好受出面啲仔歡迎，要借屋住易過借火啦；Sorry，唔係，係借屋送埋火，條仔一定有熊熊慾火要出…
媽：「你同我個女好熟㗎，見你say hi咁隨便嘅？」
我：「普通朋友啫…坐過喺隔籬，叫做熟少少咁。」
媽：「哈，坐喺我個女隔籬咪益晒你，實開心死啦。」




我：「都…可以咁講嘅，Queenie佢讀書好叻，好多科都幫到我，重成日提我做功課，真係幾好。」
媽：「哦，你唔止食蜜糖大，重係食象棋大嘅添。」
死火…就算我以前日日躝街，而家每逢周末聽阿叔㞗噏，都唔明佢呢句係講乜…滿口仁義？觀棋不語？滿口兵卒？紙上談兵？動物撕殺？
我：「Auntie…唔好意思，我唔係幾明妳講乜。」
我自細就知唔可以hi auntie，但嗌Queenie媽咪實在太譖…
媽：「我係話你車大炮，講大話。」乜有人咁用㗎咩…
我：「我無呀，佢讀書真係好叻，上堂又乖。」
媽：「有個咁靚嘅女仔坐喺你隔籬，剩係昅都開心死啦，重邊會有心情溫書做功課呀，我有無講錯？」
嘩，原來佢係開門見山嘅類型，唔知係咪蒲開嘅呢？睇怕講唔夠五句只要啱feel就可以埋牙除衫起機嗰隻，問題係…我只係一個小朋友，妳個乖女嘅男同學，呢啲咁刺激嘅對話留返幾年後我先同妳切磋好無？
唔得㗎！我點可以為佢媽咪背叛QQ？！九條命都唔夠死…




誠如QQ所言，同佢兩個母女丼應該係好多男人死不足惜…呀唔係，係在所不惜，所欲有甚於生者嘅夢想。
我：「係嘅…佢好靚女，坐隔籬好提神，但我只係普通同學嚟㗎咋…」我清白㗎…無污辱妳個寶貝女，唔關我事…
媽：「喂…究竟係普通朋友定普通同學先？」
我：「我諗…一樣嘅啫，如果無乜特別我告辭先，唔打攪auntie妳喇。」唔怪之得QQ叫我快啲走。
媽：「咪走住呀！乜無特別，我有嘢想問你呀。」
我：「係…請問auntie所為何事呢？」今勻真係hi auntie，佢阿媽性格低B，但智商都好似係正常，睇怕我乜都扮唔知比較好，以免講多錯多。