為了實現媽媽遺願，我成為了女兒國唐僧: K107

我：「得妳一個掂唔掂呀？我買定多啲點心返嚟放嘞…」
Q：「你小擔心，我有手有腳點會餓親自己。」
有爹地喺度嘅生活其實無乜特別，一家三口相處得幾好；係我同QQ都要變得檢點啲，做返個細路仔咁，QQ當然唔會喺呢啲時候直播變相有得放假，爹地亦無過問太多，因為我應承過會處理到佢嘅生活問題，既然我無求救即係搞得掂啦。雖然暑假，但爹地喺度我又唔好意思日日由朝玩到晚，所以就趁呢段時間做下暑期功課，QQ亦都有喺隔籬睇住我。
有種感覺，佢明明唔係我個妹，但而家我就要當佢好似細妹咁唔掂得佢，都好嘅…起碼唔使扯旗谷住咁辛苦。
返廣州呢啲就…大家無興趣知㗎啦，就算我堂家姐係個眼鏡大波妹。不過有樣嘢可以提下，YY講過大陸呢期唔太掂，原來真係好大影響，大伯同姑媽呢啲做廠房管理嘅，話訂單好唔穩定對佢哋收入好大影響，你知啦，大陸稍為搵到錢嗰堆都唔係靠票面個糧…生意唔好就少好多油水。
大伯話佢好熟啲生產線流程，採購工序，質管規則，進出口法律等等…所以曾經有美國對家公司問佢過唔過檔，咁人工差唔幾就做生不如做熟，一家大細喺度唔通自己一個人過去咁唔方便咩；但問題係，而家你有機會唔走，過幾年隨時要搬廠去越南柬埔寨，人到中年未必可以再適應到去呢啲落後國家生活。又原來，堂哥已經考完大陸高考，成績唔錯礙於地理問題直入中山大學，佢成績就算報香港city，poly都怕且有人收，問題係佢哋話返返嚟香港生活成本高太多，唔似得我一個人霸住間公屋…而堂姐嘅成績好似重勁過佢阿哥，但如果一條友去北京上海讀名校其實同出國係無分別。
成家有香港身份證但偏偏就喺晒廣州，我唔太明白但我好歡迎呢個結果，因為我係既得利益者…講真爺嫲兩人喺廣州住就舒服好多嘅，啲親戚朋友which is我唔Q識嘅都喺晒度，佢哋就係咁叫個仔去美國唔使理佢哋，話乜喺唔喺度都會百年歸老，照顧唔到生活就請個工人就得…堂哥堂姐就分明知道如果有得去美國讀書都一定係著數，只不過呢度住慣住熟。大伯話過到去如果順利嘅話可以順手搞埋阿妹過去，但如果姑媽走埋就真係得返兩老喺度，而做商人嘅姑丈就問係咪老公可以搞埋綠卡好似好有興趣。