為了實現媽媽遺願，我成為了女兒國唐僧: K65

由於頭先已經揀咗好多條，我隨手就執起一條魚鱗邊粉紅色滑面底底，前面印咗個豬鼻哥，後面印咗條豬尾。
蚊：「呀，點解我要著呢啲傻kai kai底褲，走光點算…」
Q：「個樣傻kai kai唔緊要，唔好真係傻kai kai就得。」
最後Queenie隨手攞多條Kuromi色黑撞紫斜條底底，都話佢係衰女包嚟，揀埋晒啲暗地裡性感款。
去到準備埋單嘅時候，細蚊想攞銀包出嚟畀錢俾我㩒住…
蚊：「唔好啦，你上次已經送咗好多嘢畀我。」
我：「無理由…我而家對Queenie咁好，以前對妳咁差…係我欠妳嘅，俾我補償返妳啦。」
蚊：「得唔得㗎？呢度都唔少錢㗎喎。」佢驚我無飯食咁嘅樣，係嘅，我一個月搵得二千五左右，攞成五嚿水嚟買底底都唔嘢少，但我重有父幹，重有QQ…
Q：「妳就由得佢扮好人啦，可以對佢有啲信心。」
我望住QQ，其實唔係佢對我有信心，而係我對佢有信心，因為佢平時自己啲娛樂費已經搞掂晒咁滯，我剩係需要整嘢畀佢食，同埋有地方畀佢瞓就好夠。




蚊：「多謝交叉仔！」佢個樣十分開心。
Q：「我都有份㗎，多謝交叉仔。」
埋單嘅時候，兩個女sales對住我笑咪咪咁，方死好似我會養唔掂兩個女仔，我諗佢哋實在係太多幻想，兩個都唔係我女朋友嚟嘅…然後買完嘢出去兜咗個圈…
Q：「不如我哋喺呢度食咯。」QQ指住間薩莉亞。
蚊：「嗯！好啊！」細蚊露出自信嘅笑容。
同QQ出街，佢早就計好晒，安全唔多人好行嘅商場，合適嘅價格同貨品，負擔得起嘅餐廳；你問我薩莉亞係咪好好味，我唔覺得，但至少可以喺大商場食，唔使捱M記KFC，又無大家樂咁悶，唔似茶餐廳咁麻甩，唔使對住張餐牌頭痛，簡單嚟講就係啱小朋友嘅餐廳。我諗高一個grade好似pizza hut呢啲細蚊都負擔到嘅，但呢度真係幾好，有一種日常嘅感覺。
我哋嚟到一張卡位，QQ拖住細蚊行咗去一邊推佢入去，將兩個六十八紙袋掉去對面就坐喺細蚊隔籬；我諗佢心入面好清楚，如果佢兩個打對面坐，我將會面對一條生命中嘅難題，我應該同EX坐定係同同居女神坐…好在。
一塊牛扒，莎樂美pizza，黑松露野菌意粉，波菜焗雞肉，腸仔薯角，三文魚沙律，中華海草，話咁快就成枱都係嘢食乜都有，兩個女人話做運動前唔可以食咁多，well…都啱嘅，因為薩莉亞唔係度度有，我以前嚟親都係食兩碟嘅。而QQ就主動話唔加飲品bar，話飲甜嘢無益喎，咁我哋咪都唔加囉，其實我知佢係為細蚊銀包著想，反正我平時九蚊就有枝一點二五Lit zero畀佢飲。