為了實現媽媽遺願，我成為了女兒國唐僧: K51

其實呢個鐘數我本來就差唔多醒，只係個腦一直留喺beta狀態介乎發夢同諗嘢之間唔俾自己起身住，所以一聽到細蚊把聲就可以即刻反應過嚟。
蚊：「你夠鐘煮mum mum畀你愛人食喇。」佢貼耳講。
Q：「人哋考完中英文喇，上嚟對下卷兼溫數學。」
我：「先…一點未夠喎，一朝就考到兩科㗎嗱？」
蚊：「補考從簡吖嘛，唔考作文同oral，每科一個鐘九個字，我由八點幾做到而家無抖過喇。」
我：「叻女…咁考成點呀，識唔識做？」
蚊：「感覺上好過上次好多，應該合格掛？」
唔好掛啦，大佬，一下又肥佬咁又讀多一年㗎喇。
Q：「而家咪同佢對下囉，你快啲起身煮飯畀人食先啦。」妳兩個係咪扯貓尾㗎，一齊叫我煮飯畀另一個女仔食；又唔係喎，話說…細蚊口中所講嘅愛人唔會係指佢自己呀？
今日餐單…酒樓冷飯，炒飯應該有嘅嘢，沙嗲醬，五香肉丁罐底啲油…重有阿信屋買嘅一包急凍辣味串燒雞，為到廿六蚊有六串，雞肉尚算大粒，算係咁啦…




我：「有嘢食喇，啲味道比較另類，希望唔好嫌棄…」
Q：「未算難食，起碼同琴晚間嘢打和。」佢潷一口。
蚊：「你哋琴晚去邊度中伏呀？」
我：「琴日去行山，行完喺天馬苑是但食啫…係呢，份卷對成點呀？唔會太差掛…」我見QQ已經當玩遊戲咁喺份卷上面寫晒答案喺度，對佢嚟講應該好淺。
蚊：「OK嘅，我諗可以啱一半以上。」
我再望一望，有啲題實在同小學無乜分別，填私梳先私營都可以有兩分，重有啲同義詞配對，car同vehicle，large同giant，happy同delight，你叫我串就有啲難，出到咁可以話為咗送分夾硬幫佢升班。
Q：「我四點多啲要出去，你好好地繼續教人計數呀。」
蚊：「Queenie今晚去邊度威呀？」
Q：「唔威呀，同啲姐妹去尖咀食下生日飯咋嘛。」
蚊：「噢。」佢雙眼發光咁，平民幾可去尖咀食飯，通常係為咗慳錢過港島先會去搭天星小輪。




我：「妳…今天生日嗎？」
Q：「唔係呀，正日留返畀男朋友。」呢句唔知佢係想講畀我定細蚊聽，不過都好嘅，唔想細蚊諗到我哋晚晚喺屋企玩狗男女嘅遊戲，QQ始終係矜貴嘅女仔嚟。
我：「玩得開心啲，預祝妳收到好禮物。」
食完飯就洗碗，QQ繼續教細蚊做數，到咗三點幾我接手，QQ就喺度畫花面貓…我諗，Uranus同Zilvia應該唔會化咁多妝？佢都係同YY鬥啫，但未見過又真係唔知。最搞笑係有時我覺得佢化唔化都無乜分別，嗰小小精準嘅修飾真係要專心咁留意先睇到。
蚊：「Queenie，聽日我考完試，不如慶祝去玩下？」