為了實現媽媽遺願，我成為了女兒國唐僧: K43

Q：「嚟啦，開工喇。」QQ即刻霸住咗獅子山四百九十五米嗰塊牌，望住佢心口真係夠晒郊遊遊…
呢啲指定動作我已經有muscle memory，而阿健就好似唔多自在咁；係嘅，有個大靚女喺度昅又唔係，唔昅又唔係，而且我又好似護花使者咁，但其實我算得係啲乜，人哋本身有男朋友，又會同其他仔玩，你鍾意咪獻身囉。
影完一陣，QQ坐喺塊大石上面休息。
健：「諗住…幾時再開始行？」
Q：「都就嚟六點，睇埋日落，再影多幾幅相先。」
健：「哦，好嘅。」對住女神囈都無得囈。
喺度等運到嘅時候，自然就會㩒電話，我開個地圖出嚟對下邊個屋邨喺邊個位，研究下自己以前行過嘅地方。
我：「Queenie妳喺度玩緊乜呀？」
Q：「溫書囉，計緊數呀，一唔一齊？」
健：「呢個乜嘢app嚟㗎？」




Q：「Khan academy囉，唔使錢㗎，唔止數學，phy，chem，電腦，econ，甚至乎英文都有。」
我：「x square加8x加15…唔係2ab嚟喎，點計㗎…」
Q：「就算兩嚿嘢唔同你都識乘開㗎嘛，而家咪諗下點還原，有乜數可以乘到15再試囉。」
健：「唔係可以用quadratic formula咩？」
我：「乜嚟㗎？」求下你哋唔好蝦我得唔得？
Q：「先生有提過㗎，而家唔考啫，遲啲咪又係要學，呢啲簡單嘅唔使用formula嘅，心算已經可以。」
健：「Queenie妳真係好勤力，行山都可以溫書。」
Q：「唔好嘥時間嘛，Uranus試做埋DSE數學past paper添，暫時識一半左右，已經穩二。」
我哋兩個望住佢喺紫禁之巔做數，不禁汗顏，慨嘆…
健：「不如…我哋都整返場華山論劍？」




我：「嘩…你唔好講啲咁恐怖嘅嘢得唔得呀？」
健：「乜呀，我係話趁得閒打返鋪傳說呀。」
我：「咁咋，但喺呢度會唔會收得唔好㗎？」
健：「咪試下囉，我都無打排位好耐，去坑下人囉。」
結果就係，邊個話空曠地方就會連到線？GPS咩…
健：「喂！我二百幾ms呀，要提早㩒制先得！」
我：「我停唔到自己衝咗入去人哋個塔度！」
其實，做個低低BB嘅中學生咪幾開心，係咪？
夏天日長夜短，我哋足足等到成六點九先開始日落，靚係幾靚嘅，望住太陽向青馬大橋嘅方向沉去，同QQ都睇過好幾次日落，如果係普通男仔女仔唔係一早拍拖就已經無下文，不過我哋咯…重點係幫佢影相出post。
健：「睇埋落晒山就會天黑㗎喇喎…」




Q：「做乜呀，咁大個人怕黑呀？」其他人已經走晒。