thriXt Qantasy 純文字安眠之作 (New: - U2K - 一直上架): K37

其實我對佢點樣掂Bubble對波波無乜興趣知，我比較關心到底佢當晚同Bubble講咗啲乜，不過算啦…
而佢對Kuromi重有無感情呢？我唔知，但一個普通男仔有幸近距離睇到女神呢個打扮就點都係震憾嘅。
入到車廂我識趣咁排成嬲字型坐，不過佢兩個就無講過嘢，而車廂入面就好多男人望過嚟…QQ呢邊，都慣晒㗎喇，俾著我喺街見到個咁索嘅女仔都一定望啦；亦都有啲女仔會留意女神，我諗係妒忌羨慕再加咬牙切齒。
健：「沙田坳道…等我睇下先，出口係…」
Q：「咪住，我哋兩個未食嘢，去咗醫肚先。」
健：「係嘅，咁我哋去食嘢先。」頭先喺度催催催，如果得我喺度知我未食晏就實屌㞗我都似，對住女神就…
QQ亦好熟路咁帶咗我哋去黃大仙中心入面嘅一間日式炸雞店，女神出街食嘅嘢又渣得去邊吖，但我望一望個餐牌發覺唔算太貴，定食六十蚊有找咁囉。
坐低後唔使點睇已經揀好，因為得幾個set only。
Q：「阿健你唔食啊？」
健：「咁…食囉，同阿爽一樣就得。」




死仔包，女神叫你食屎你都擘大口接㗎啦，有種就同女神食同一樣吖嘛，做乜要抄我啫。
QQ食殘忍親子丼定食，我哋就係黑胡椒雞髀肉定食…
嘢食嚟咗，我同QQ迅速開餐，因為已經肚餓。
Q：「你兩個做乜唔講嘢呀，唔使理我㗎喎。」
我同健仔喺對面面面相覷，講乜好？Bubble波波軟唔軟？
健：「你兩個夠無嘢講啦…」
Q：「我同佢日日喺屋企對住，使乜特別出嚟講。」
無論何時何地，QQ講嘅嘢都係咁有說服力，不容質疑。
我：「Queenie，呢間啲炸雞幾好味。」
Q：「知吖，你唔夠五分鐘已經食晒碗飯。」




健：「我分啲飯畀你吖。」被迫食多餐嘅傻仔夠晒客氣。
我：「多謝晒。」就算無晒肉，撈啲燒汁已夠好味。
Q：「你兩個平時出嚟玩又係無嘢講㗎？」
我：「咁又唔會，不過佢呢個禮拜搏盡老命做運動，好似已經唔係幾夠氣講嘢。」
Q：「呵，唔知可以維持到幾耐呢…不如，討論下嚟緊出年嗰班邊個女仔最好J？」
健：「呢啲問題…答係妳又死，答唔係妳又係死。」
Q：「做乜要J我啫，我玩到你雞毛鴨血，你J唔落嘅。」
我：「都未開學，咁快就知我哋班有邊個女仔喇咩？」
Q：「因為唔係好多，得十二三個左右，其他全部男仔，有留意開啲人想點揀科嘅都會知。」