為了實現媽媽遺願，我成為了女兒國唐僧: K29

健：「服咗你，咁聽日抖一日，我上網睇下再覆你啦。」
為咗生活奔波係好正常，但我校園生活嚟㗎咋！
我：「兩位靚女，我去開工喇！」
沖完涼出嚟佢哋重溫緊書書，枱面有兩個清咗嘅燒臘飯盒喺度，青春期嘅女仔都幾擦得，想食下口水尾都無，可能係咁溫書會消耗好多體力掛。
蚊：「呀，咁我順便送埋你去返工啦，我都夠鐘走…」
然後佢就匆匆忙忙咁同我一齊出門口。
我：「聽日幾點嚟呀？我會有多啲時間喺度陪你喇。」
蚊：「我周末留屋企溫，你可以同Queenie二人世界。」
我：「嗯，唔通已經溫晒所有書咁叻？」
蚊：「邊有可能呀？但我已經麻煩咗佢好多日，唔可以日日都係咁嘅，同埋我留喺屋企溫可以做下樣俾屋企人睇，費事佢哋會懷疑我借啲意偷走出去玩。」




我：「都明嘅，補考要畀心機，知唔知？」
正當我想同佢道別嘅時候，佢一嘢攬實咗我，踮高隻腳嘴埋嚟，再夾硬塞埋條脷入去…我當然唔會拒絕嘅，只係有啲突然唔知點好，用條弱小嘅脷嚟回應返佢。
細蚊一啲都唔怕醜，鍾意一路打一路望住我。
蚊：「嘻嘻，唔使咁驚喎，我只係學你以前咁，鍾意同你玩，享受你嘅身體…好好返工養女神喇，bye。」
講完佢就讕係瀟灑咁走咗…呢個細蚊，我先唔信妳呀；不過維持現狀都唔錯嘅，至少QQ又唔會有啲乜大反應…
容許我再重申一次，白飯撈辣菜脯甜豉油係幾好味嘅，當然如果有啲雞丁，肥牛，肉丸，腸仔之類就更加好…
放工返到屋企，開門聽到有琴聲，即係話QQ多數喺度直播緊，咁我就絕對唔可以大聲講我返屋企喇。
性感嘅衣著依然，但我唔係鍾意返工狀態嘅佢，不過我鍾意佢搵到錢可以減輕我經濟上嘅壓力；唉，矛盾呀！
然後過咗陣佢就下線執嘢。
我：「辛苦晒妳…溫咗咁耐書重要直播。」




Q：「普通啫，啲嘢又唔深我當refresh下都幾好，見有時間咪播下順便練琴，搵返少少錢可以暑假去玩下。」
我：「係呢，阿健聽日唔搵我玩喇，可以留屋企或者…」
Q：「你唔使特別報告畀我聽㗎喎，你又唔係我嘅，就算你同佢擦出基情我都唔會理你㗎喎。」
我：「無可能！我咁鹹濕，有乜可能會對女以外嘅物體有興趣？！」難得地我可以以呢樣嘢嚟引以為榮。
Q：「乜鹹濕一定要同異性？同同性咁攪又點叫？」
我：「又…好似係喎…」就算要都要奧丁嘅級別啦。
Q：「我成日喺你啲AV入面見到清水健，都懷疑過你係咪對佢有啲興趣…而且清水健同傻仔健好似差唔多style。」
我：「有…有乜可能？！咁係因為清水健係日本最勤力嘅男優嚟咋，而且傻仔健何來有咁大隻？」