為了實現媽媽遺願，我成為了女兒國唐僧: K28

Q：「關於呢個問題…我哋從來都唔會直接互相比較成績，但係有個譜知道大家考成點，但就算知道都會扮唔知，所以…你就唔好問我呢樣嘢。」
女孩子，實在係一種非常之咁複雜嘅生物。
到咗第二日晏晝，細蚊又好乖乖咁上嚟溫書。
我：「兩位靚女…阿健…想搵我去踢波。」
Q：「你咪去囉，你留喺度都驚悶死你。」
我：「咁妳哋今晚嘅晚餐…」
蚊：「唔緊要呀，我今日諗住溫到八點返屋企食飯。」
Q：「放心啦，我唔會餓死。」
勤力嘅細蚊同埋熱血嘅阿健嚟到第二日，就係咁攪到我暑假都無得抖下，你要知道我以前遊街嗰陣可能睇成粒鐘先會踢一場，主要都係用嚟hea時間，而家咁樣陪佢踢，基本上抖完一場又要繼續踢下一場，都咪話唔攰，而且之後佢重要我陪佢練跑…結果，我帶咗兩個麥樂雞餐返屋企。
基本上呢個禮拜就係咁度過，到咗星期五…




我：「要停喇，我要返屋企沖涼再落返嚟返工…」
健：「哦，咁行啦，使唔使食啲嘢先？」
我：「無時間食喇！返公司裝啲白飯…撈啲辣菜脯同甜豉油頂住肚先。」我不得不佩服自己嘅廚藝。
健：「真係辛苦晒你喎。」
呢條友仔，以前搵你玩就日日都話返屋企食飯，而家屋企會留飯畀你，就唔chur到我嗌停都唔會走。
健：「星期六日放假，不如搵啲嘢搞下咯？」
我：「乜而家放暑假，重有分放唔放假㗎咩？」
健：「有㗎，早啲出嚟玩，可以唔使對住屋企人吖嘛。」
好嘢呀你，你唔想對住阿爸阿媽，但我好鍾意對住QQ。
我：「咁你想去邊？太貴嘅話就唔好預我。」




健：「唔貴呀，我諗住去行山，免費㗎。」
大佬，你有無諗過係咁做運動要食嘢補充體力，其實都係錢嚟？雖則我而家白飯唔使錢。
我：「都可以嘅，算你有啲新意唔使咁悶，行邊呀？」
健：「唔知喎，又無行開，你有無idea？」
我：「以前行山我係為咗挑戰整塞個集水區㗎咋，哈…」
健：「點解你可以咁惡趣味…塞咗會點？」
誠如溝女一樣，以前搞破壞活動我從來都唔會預同學份，因為佗手掕腳之餘重會驚俾人㧻，所以只會撩啲街童即興去玩，名都嗌唔出，而且出咗事就可以大難臨頭各自飛…
我：「我只係發現到人嘅力量好渺小，掉咗過百塊大石頭落條漕度啲水仍然暢通無阻咁流動，只係攪到自己好似做完苦工咁，到我過幾日想去繼續嘅時候，發現啲石俾人清走晒，原來香港好多工人默默咁工作緊…哈哈…」