為了實現媽媽遺願，我成為了女兒國唐僧: K20

Q：「快啲去游水呀，無眼睇你。」
就係咁，我同健仔就出咗門口，搭兩個站地鐵去泳池。一路上佢都無乜嘢講，應該諗埋晒啲古古怪怪加不切實際嘅嘢，例如軟呼呼暖笠笠嘅嫩肉；俾著以前放暑假，我哋可能會分享下準備煲乜嘢game，有無模型要砌，煩下佢幾時陪我㧻康樂棋，不過而家就算啦；而且又唔可以講女刺激佢，又唔可以爆我身邊啲事畀佢知。
健：「乜真係有本書叫做…把班花推倒的絕對攻略㗎？」
我：「你信嗰個女人吖，叫佢寫本賣畀你。」
健：「如果佢真係寫，我擔保可以由頭到尾背默出嚟。」
我：「喂…該煨，你唔係重對佢咁痴迷呀？」
健：「唔係，只係我覺得有啲嘢由女神親口講出嚟會好有參考價值。」
我：「其實你可以問佢㗎，如果你唔怕傷心嘅話。」
健：「我怕呀，我唔想見到腹黑嘅Kuromi批到我一文不值。」
我：「喺邊度跌低，咪喺邊度起返身囉，哈哈…Queenie平時係有寫下嘢，但唔會係溝女攻略嚟喇。」




健：「都正常嘅，佢中文咁好，咁你幾時帶我去買溝女書？」
我：「你唔係認真呀？呃人㗎，你見啲阿叔日日買馬經，有無一個係真係發到達？」
健：「喺女神口中講出嚟，好似乜都變得可信。」
救命…唔怪之得咁多靚女去做倫敦金。
我：「我未睇過呢啲書㗎喎，不過記得Queenie提過有本書叫男女大不同，或者你可以睇下，但我都未睇過。」
健：「但係你都可以同佢哋相處得咁好。」
我：「被迫㗎咋，日日都對住重可以點，唔出聲呀？」
健：「重有得俾女神摸摸肚。」
我：「噍，佢玩我咋嘛，根本就唔係一回事嚟。」
健：「即係話平時有更加多嘅一回事。」




我：「勸你唔好咁多幻想，聽女神話去操fit啲啦。」
健：「如果再有機會同你踢足球，我唔會再輸比你。」
我：「你邊係輸比我，黑仔咗少少啫…如果出年真係又搞得成，睇怕我都走唔甩，到時會再嚟多次倒掛救龍。」
健：「個個爭射波，你走去爭救波，做乜唔做龍？」
我：「就係多人爭，無謂辛苦自己，唔知點解嗰下好好feel，可惜都係救唔到，同埋…咁樣先可以同你對決。」
論溝女，佢連個start制都未㩒得郁…但總算，有啲嘢可以令佢有返啲精神，如果唔係都唔知點溝通。
可幸呢條友識游水都無咁廢J，換完泳褲一落到池…
我：「咁早嚟到，成個場都係阿叔…」點知…
我未講完佢就彈咗出去，佢真係嚟游水㗎喎…
健：「呼呵…呼呵呵…」溝女有必要咁辛苦？