為了實現媽媽遺願，我成為了女兒國唐僧: K11

Q：「無眼睇，快啲去沖涼啦，今次要靠你自己。」
我：「無呀，唔理佢，今日夠喇，要好好休息。」
Q：「真係陰功，睇到我都心痛，或者…你第時有啲乜重大貢獻，我可以試下幫下你做邪骨妹嘅。」
我：「唔使，我呢個人其實無乜頁獻。」
講完就入咗廁所…嗚嗚嗚…明明係我拯救妳喺水深火熱之中，重講乜嘢重大貢獻喎！同埋，我唔係要妳做我嘅邪骨妹，我係好想同妳談戀愛…就算知道結果可能會粉身碎骨都好，俾我試一次。
沖完涼出返嚟，見到QQ除返個Bra，轆緊電話。
我：「細蚊佢真係成袋嘢放返晒喺度呀？」
Q：「佢攞咗兩件薄嘅返去囉，話少少地就算屋企人問起都可以話係師姐畀佢，如果多嘅話唔知點答好，佢話搵日等屋企無人先偷運返去收埋喎。」
我：「吓，咁嘅話佢如果要著使唔使偷偷地著？」
Q：「唔知佢喇，可能要慢慢溝落去，但你唔會唔明嘅，佢又無收入來源，屋企畀嘅零用錢咁多就係咁多，突然之間多咗袋牌子衫係會有啲可疑，雖然我覺得作為一個女仔叫男仔送下嘢完全係一件好正常嘅事嚟。」




我：「妳估個個係妳咩…出身已經決定晒一切，都唔知點幫佢好，好在佢份人算係幾睇得開。」
Q：「係㗎，好多小朋友未返學已經狂去playgroup，playground，disney，被迫陪老竇老母周圍飛去旅行，童裝全套Burberry，手揸父母啱啱換出嚟嘅上一代iPhone，一個月燒嘅錢分分鐘多過你一年。」
我：「就算使得起，我都覺得好浪費，如果我屋企係有錢人，我寧願佢留返啲錢畀我大個咗先自己決定點用。」
Q：「嘩，咁重得了嘅，肯定成屋game，或者LEGO同高達，結果其實差唔多無謂。」
我：「未必嘅，可以多啲錢挽救不幸嘅富家女。」
Q：「勸你唔好咁多幻想，咪以為屋企有錢就好好玩，好多都係怪獸家長嚟，你未必買到LEGO，但係補習都補死你，尤其你呢啲咁鬼懶。」
我：「可唔可以平衡啲…唔開心嘅小朋友點讀書。」
Q：「咪一樣睇運，有家長會打埋本畀仔女拍拖添。」
我：「妳係咪講緊妳個男朋友…」
Q：「嚴格嚟講係嘅，未識搵錢但係又要使錢，唔靠屋企人唔通可以變出嚟咩？」




我：「佢屋企真係完全唔知佢有女朋友？」
Q：「我無興趣深究呢個問題…可能懷疑掛，但都唔知去到邊個stage嘅，你估溝女唔使錢咩？」