為了實現媽媽遺願，我成為了女兒國唐僧: 977

我：「大同細有無乜分別？」
馬：「呵呵，龍蝦係一樣好複雜嘅食物，剩計似樣都成十幾種，如果計埋奇怪樣嘅隨時有三四十種，有啲得個樣一啲都唔好食，有啲好罕見又奇怪樣但好好食，龍蝦大細最主要影響氣派，如果全包宴起碼都要一隻兩斤半先夠面子，味道方面其實唔大分別，大隻會考廚工多啲，但如果煮得好一大嚿龍蝦肉啱啱放得入個口，尤其係南澳龍蝦呢…不過我哋呢度唔會有得食。」
我：「多謝你話畀我聽…」真係得個聽字。
馬：「係呢，你同個女仔點樣呀？」
我：「我…我哋，係好朋友嚟㗎咋。」
睇怕佢頭先睇到我哋俾人玩要惜惜。
馬：「嗯，青春真係好，要好好珍惜，都要認真讀書。」
我：「係嘅，我會㗎喇。」
馬：「話時話，你好似已經喺度做咗半年。」
我：「係呀，差唔多…由新年前做到而家。」




馬：「嗯，我見你都幾肯做嘢，朝早開場同洗碗嘅都無投訴，時間又就到晒唔使趕返工放工，不如…就加你少少人工，二百蚊日啦，亦方便我計數，不過盡咗㗎喇。」
我：「好多謝馬叔叔！我會繼續畀心機做嘢！」
我向佢四十五度鞠躬表示謝意。
馬：「好啦，咁你放工喇，我都係時候走人。」
太好喇！即係我嘅日薪由原本嘅…一百六十六個六，加到二百，即係…無計數機計唔到幾多個%喇，總之我一個月大概返十三日工，就會有二千六百蚊！係咪應該要同QQ講呢？不過多呢少少錢對佢嚟講又好似唔會有乜大分別…
點知我返到屋企一入門口，就見到佢撓埋手坐喺電腦凳上面迎接我，加埋面上露出詭異嘅笑容…
Q：「你好嘢呀下，何解我梳化上面啲bra會自己走咗入喼㗎？」差啲唔記得咗要同佢交待返今日發生嘅事…
我：「Queenie，放心啦，我而家會同妳講。」的確唔可以再呃佢，我哋之間要有信任。
Q：「你唔同我商量下就叫人上嚟，唔擔心嘅咩？」
我：「韻婷…佢係好女仔嚟，又唔鍾意講人是非，所以我相信佢…對唔住呀，無問過妳就擅自帶咗佢返嚟屋企係我唔啱，但因為事出突然，結果就咁…」




Q：「咁你同佢玩得好開心啦，係咪？」
我：「我同佢…唔會有繼續㗎喇，妳唔使擔心。」
Q：「你請咗人哋食檸檬？」佢個樣表示有啲難以置信。
我：「嗯，妳估中咗，佢真係趁最後一次機會同我表白，而且主動到我想象唔到嘅地步…我諗住…唔想佢俾我拒絕得不明不白，所以先俾佢上嚟，等佢知道我嘅情況…」