為了實現媽媽遺願，我成為了女兒國唐僧: 975

諗都唔諗就偷偷地閃電手放入口，喺呢方面我都幾變態…
※※※※※
呢一餐，應該係我作為社長最後嘅職務。
我：「陸sir，各位幹事，各位隊員，我作為綠社嘅社長希望可以喺度代表個社感謝咁多位嘅付出，全靠幾位幹事一直以嚟嘅積極參與，綠社喺呢一年先可以運作順暢，幫學校搞咗大大小小各種唔同嘅活動，亦都好感謝參與社際足球賽嘅咁多位隊友，全靠你哋喺綠茵場上面搏晒老命，先有今日呢場咁精彩緊湊嘅賽事，為咗感激你哋嘅貢獻，今餐非常難得可以喺我哋社嘅活動預算入面抽到少少出嚟sponsor，另外我自己都會出多少少，所以各位剩係需要夾返一餐lunch嘅價錢…」
呢個時候陸sir企起身搭住我膊頭…
陸：「其實作為社嘅負責老師，我哋做到嘅嘢可以話係少之又少，基本上係全靠同學嘅積極參與先可以成事，你哋都知道一個社有咁多位同學，我係好難可以公平咁慰勞晒所有人嘅，不過我相信今日在座嘅同學都有重大貢獻，所以呢，我都無理由唔出返少少力嘅…最緊要大家食得開心啲！」佢講完就喺銀包攞咗兩張五百蚊紙出嚟塞咗畀我。
「社長，做乜唔同我講喎，使乜一個人硬食晒呢，我ok㗎喎，呢度我熟客嚟，學生幫襯重有九折添，剩返嘅我同妳share咗佢啦。」連副社長都…
「老細萬歲！」「多謝陸sir！」
總算…可以話係放低咗一嚿心頭大石。
「咁多位同學仔！等我上咗個海鮮盤先呀下，最緊要趁新鮮食，每人有兩隻大蝦，一隻蟶子，一隻扇貝！肉類嘅就要劃飛，啲丸呀公仔麪呀菜呀就自己出去攞，雪櫃嘅飲品都係，不過…唔好攞啤酒累我哋俾人拉呀！要飲…就飲jolly shandy啦，唔計數嘅。」




「Yeah！開餐！」「飲杯先！」「啲蝦重郁緊…好殘忍！」
八位隊員，五位幹事，一位先生，十四個人迫迫哋啱啱好塞得晒落一張大枱，呢種熱鬧嘅氣氛都幾好，任食又唔使驚佢哋唔夠飽；不過呢，今日場波完咗之後阿健就好似心事重重咁，佢到底係唔忿氣今日嘅表現，定係…
食咗好多好多嘅嘢，飲咗好多好多嘅jolly shandy，完成埋今日嘅聚餐活動；我係講啲男仔呀！佢哋有得任食就會變得好恐怖，就連牛肉都嗌咗成三十碟，重可以一人一個公仔麪…當然我係唔敢食咁多嘅，而且一路諗住死人爽嘅嘢，而阿健嘅食量亦都明顯比唔上其他野獸，我同佢有時都會咁啱對望到，跟住佢就會煞有介事咁避開…
唔知男仔對住食物同女仔係咪都係一樣樣嘅呢？有啲驚…
最後我同副社長每人夾咗四百幾蚊埋單。
「多謝晒陸sir！」「多謝晒兩位社長！」「拜拜喇！」