為了實現媽媽遺願，我成為了女兒國唐僧: 948

我放好個波，望住佢…如果太大力，我好驚又打飛機；記得老竇講過，射十二碼，如果俾人擋到，咁係個龍門勁，係你黑仔，而唔係你嘅錯；但只要一撞柱或者中楣，你可以準備定執包袱返屋企；另外，唔好俾龍門估到你會射去邊。
調轉嚟講，我估到佢會撲邊邊，射另一邊就搞掂。
如果我知道QQ會接受我，根本就唔需要表白。
就好似YY所講，有運氣嘅人點玩都會贏。
於是我褪後行咗十步，跑，再加速，無錯，就係咁！
只要無方向，就唔需要估粒波會飛去邊。
我好似㧻棋咁用腳內側猛力平撞個波，隨即沿住地面直飛龍門中心，而個龍門就向側少少跳起咗…
現實上係唔會有健威冒住撞死自己嘅風險跳去門框嘅平面，只要你跳起咗就無可能控制到自己嘅身體。
個波嘅速度唔算快得好緊要，但當個龍門跌返落地想伸腳去截嘅時候，粒波已經…
「Yeah！終於贏！」「瘟神好嘢！老細好嘢！」




瘟：「喂！喂喂喂！搞乜呀！咪抬呀！」
我啲隊友興奮到成班抬起咗社長喺度跑，連啲女都入埋嚟跟隊，不過…呢啲場面就唔係幾啱我嘞，我無咁熱血；我踎咗喺阿健隔籬，同佢一齊望住個龍門。
我：「呢度有乜睇呀？」
健：「龍。」
我：「起身喇，Bubble對波波等緊你。」
健：「點解…要咁樣罰我…」
我：「如果你覺得係罰…因為…你射嘅波太靚。」
的確，平時考試陸運會呢啲，炒咪炒囉，就算輸咗都只係自己嘅事，但落到足球場，自己嘅一腳係會影響晒所有人嘅心情，所面對嘅失望實在係可想而知；而我，之前搞咗咁多嘢總算無白費，至於場波…OK啦，贏咗對我嚟講都係一件好事。
我企起身望住Bubble，佢對住我微笑，好似已經釋懷。
瘟神亦都俾人放返落嚟，行埋去同Bubble握手，然後哄埋去佢耳仔邊講嘢，Bubble又咬返佢耳仔…旁人無人會知，但我肯定佢兩個謦緊六千蚊嘅交收。




B：「喂！起身喇！我哋攞咗亞軍！唔準咁樣呀！」
唉，呢啲咁尷尬嘅嘢，真係留返畀你哋做。
「社…社長…妳做乜…」Bubble攤開雙手。
B：「你哋為個社搏盡老命，我要多謝返你哋！」
「但係…社長…我…我哋…」
B：「做乜呀！係咪嫌我唔夠靚女唔肯抱住我呀？！」
然後，大家可以諗諗，八個滿身臭汗污糟邋遢嘅男仔圍住一個大波女仔攬埋一齊嘅場面…Oh sorry，係我諗多咗，努力咗咁耐，無論成敗都係應該發洩下嘅。
瘟：「各位隊員，幹事！啱啱已經卜咗位，就喺學校對面間酒樓，今晚七點再見喇！快啲返屋企沖涼唔好臭親啲靚女！」見到隔籬嘅Bubble，認真諷刺…