為了實現媽媽遺願，我成為了女兒國唐僧: 947

就係咁，我哋改為單前陣式，瘟神抽起拍開嘅左衛同佢平排，調我企死左招呼阿健，中衛換咗個精力充沛嘅後備。
瘟：「無論如何都唔可以俾對面入，就算犯規都要阻止佢哋，最多踢十二碼，我哋勝算應該大啲！」
一輪變陣後，加時開始，略過；由於大家都死守加上體力透支，實在無乜描述嘅價值；就係咁嚟到十二碼環節！
我：「哈，祝你好運嘞…今次。」
健：「放心，你準備定過去讚Bubble姐姐對波啦。」
我：「我又有乜所謂，無論贏輸我隨時讚都係咁，不過你又知道你啲隊友一定入波？」
健：「因為…我哋所有人都唔會辜負社長對我哋嘅信任。」睇嚟佢哋真係中女毒攪到short咗。
講真，背後有個女社長支持又真係好過喺場入面聽住瘟神枝笛，雖然我個人嚟講就無乜感覺。
十二碼由我哋先射，兩個前鋒加左衛都入咗，對面就出三個中五先都係入咗；第四球到瘟神，拜託要入呀，你有你嘅六千蚊，我有我嘅賭注，相信你都唔會亂嚟。
一下腳背正面勁射！中間偏右位置，守門員郁都無郁過，睇住個波喺隔籬飛入球網，呼。




對面嘅第四球，嚟到阿健，佢將個波放喺十二碼點上面。
佢褪後幾步，助跑，右腳一嘢批落波底，腳內側同個波擦出一個漂亮嘅弧線，向龍門嘅左上角直接彎去，估唔到而家嘅佢可以做到咁精準嘅射門角度！更估唔到嘅係！對面龍門估中咗個位置直接撲去，右手握拳一嘢打走咗個波！
我：「Yeah！Yeah！YeahYeah！」
我興奮到跳起！重衝向前圍住傻仔健轉圈，你是太陽，我是地球，啦啦啦！直至我頭頂受到一下重擊。
瘟：「喂！未贏㗎！Short咗呀？！」
佢好嬲咁望住我，同一時間個心喺度暗笑緊。
就連個球證都盯到我實一實，好似想畀牌我咁款。
我：「未贏？」其實十二碼點計㗎？
瘟：「頭五球要踢晒㗎，除非一邊無可能追和。」
哦…原來係咁…就連隔籬影緊相嘅德爺都恥笑緊我…




我更加唔敢望向觀眾席，一陣如果輸返就聽搵窿瓹。
而阿健呢個時候踎咗喺度，唔知佢諗緊乜嘞。
瘟：「第五球就由你射啦，阿爽。」
我：「吓？吓！但係我後衛嚟㗎咋喎。」
瘟：「七人足球有幾多條友呀？我話係你就係你啦。」
點解，突然之間要將呢個重任交畀我，我只係想食花生…
瘟：「唔使學你朋友，簡簡單單就得，個個都係咁入。」
呢句真係玄之又玄，係人都知波係圓嘅，女人係用水做嘅，太大蠻力都好易有反效果；射波就同表白一樣，無論你幾咁別出心裁，都會有意料之外，如果個女仔對你無興趣，不如做少啲馬騮戲；相反如果佢都係有意思，倒不如單刀直入，一句我鍾意妳，如果無反抗就抱住人啦。